Mizoram BJP-in Yoga Day an hmang ; MPC party-in Yoga hman an duh lo

BJP Mizoram Pradesh chuan nimin khan an pi-saah International Yoga Day lawmna hun an hmang. Hetih lai hian, MPC party chuan Yoga chu Hindu sakhuaa innghat leh Hindu tihlâr tumna nia an ngaih avangin an duh loh thu an tarlang.

Mizoram BJP-in Yoga Day lawmna hun an hmannaah hian an vice president MC Awia'n thu sawiin, Yoga chu Mizo ṭhenkhatin sakhuana nena la kawpin, BJP beihna hmanruaah an hmang niin a sawi a, "Kan khawhawi hi tizau ta ila, Yoga he ti em ema kan insawi-

ṭhaihna hi a awm ka ring lo. Keini ringtute tan chuan thil kan tihna apiangah Isua nena kan tih hi thil pawimawh ber a ni a, taksa hriselna kan tihna hmanruaa Yoga kan hmang a nih pawhin kan duh chuan Isua nen Yoga hi kan ti thei reng a ni," a ti.

MPC party erawh chuan Yoga chu Hindu sakhaw biakna hmanraw pui ber pakhat a nih thu sawiin, "Yoga hi Kristiante sakhaw innghahna thurin khawih dahlauna leh pawhpenna hmanraw ṭangkai tak a nih hria a, BJP sorkarin Kristiante chenna state-ah Yoga hman a nih theih nana theihtawp chhuaha an hmalakna hi Kristiante nêkchêpna leh dodalna lian takah kan ngai," an ti a; Yoga chu ṭha lo an tih tak zet a ni thu an tarlang.

Mizoram, Mizo hnam leh Kristian sakhua sâwi nghîng zawnga BJP sorkar hmalakna chu a tàwp thlengin an dodal zel dawn tih sawiin MPC chuan, "Yoga hi Hindu sakhaw rin dan leh tih dana innghat, Hindu philosophy a ni. Hindu thila Kristiante inhnamhnawih ve hi Mizote tan a rem ve lo a, inthiarfihlim turin Mizo mipui kan chah a ni," an ti.

Yoga Day puala Healthy Mizoram Campaign hawnnaa Central YMA leh MZP-te an tel duh lo chu lawmawm an tih thu an sawi bawk.