Serchhip district-a bank hnathawh thlirlet

Serchhip District Consultative Committee (DCC), District Level Review Committee (DLRC), District Level Security Committee (DLSC) chu nimin khan DC Sangchhin

Chinzah hoin a pisaah an ṭhu a; kum 2016-17 chhunga Serchhipa bank-te hnathawh an thlirlet.

Sangchhin Chinzah chuan, bank tel loin sor-karin hmasawnna hna a thawk thei lo tih sawiin, "Mimal sumdawng leh thil siam chhuahna neite pawhin bank tel loin hma an la tak tak thei lo. Mi tam takin bank nihphung leh hnathawh dan an hrethiam lo a, an sum pûkte rûl ṭha duh loin harsatna an siamsak ṭhin a, chu chuan hma lam panna kawng a tibuai ṭhin a ni," a ti.

Meeting-a tarlan dan-in, Serchhip district-ah hian kum kal ta chhunga bank-a sum dah (deposit) zawng zawng chu cheng nuai 16696.74 niin, loan chi hrang hrang pek zat chu nuai 9456.51 a ni a, credit deposit ratio (CD ratio) chu 56.64% a ni.

Hetih lai hian, CD ratio bituk zat chu 60% aia tlem lo a ni a; United Bank of India (UBI) chu CD ratio sang ber niin 71.01% a ni a, a hniam ber chu SBI niin, 42.86% a ni. CD ratio hian nikum a phak lohna chu 2.13% a ni.

Annual Credit Plan hnuaiah priority sector bikah target chu cheng 2315 a nih laiin, nikum chhung khan cheng nuai 3198.88 pek chhuah a ni a, target an khûmna hi 138.18% a tling.

Hetih lai hian, priority sector pêng pathum zingah, industry sector hnuaia loan pek a tlem a, 65.03 % chauh a tling. Industry sector a hniam chhan hi industry activity a tlem vang a nih thu sawi a ni.