Tui lian tuarte dinhmun enfiah

West Tuipui bialtu MLA Nihar Kanti Chakma, BSF 159 commandant LS Dahiya, Tlabung SDO(C) M Misael leh SDPO Beihmataosa-te chuan nimin Khawthlangtuipui lianin a chîm Tlabung leh a chhehvel khaw hrang hrangte an tlawh a; mipuite'n harsatna an tawh dan an enfiah.

NK Chakma chuan, khuarel chhiatna vanga Tlabung leh a chhehvela harsatna tâwkte a tuarpui thu sawiin, an dinhmun chu sorkarin a hriatpui thu a sawi a; tui lian tuarte hnenah chhawmdawlna hmahruai pêk thuai tum a nih thu sawiin, "Vanduaina tawkte'n sorkar aṭanga ṭanpuina awm thei apiang an dawn theih nan theihtawp chhuah mek a ni," a ti.

NK Chakma chuan, tui lian tuarte chhawmdawl kawnga mi tlawmngaite inpekna fakawm a tih thu sawiin, "Hetiang hun harsa leh khirhkhân a lo thlena inthliarna rilru kan dah bo leh kan zavaia kan thawkho hi a hluin a ropui hle a ni," a ti a; tui lianin a tihbuaite ṭanpui kawnga tlawmngai pawl hrang hrang, BSF leh mipui ṭanrualna fakawm a tih thu a sawi.

159 BSF commandant LS Dahiya chuan, YMA, YCA leh YPA-ten Tlabung leh a chhehvela tui lian tuarte an chhawmdàwl dan leh an buaipui dan chu India ram hmun dangah a hmuh ngai loh thu a sawi a; a mamawh apiangte ṭanpuitu nih tum zel turin pawl hrang hrangte a ngên. BSF chu ramri veng tura thawk ni mah se, ṭanpui ngaite tan an pên chhuak zel dawn tih a sawi bawk.

Tlabung SDO(C) chuan, tui lian tuarte'n ṭanpuina an dawn vek theih nan dik taka thil ti turin mipui a ngen a; khaw hrang hrangin tui lian an tawrh dan kimchang ziaka an thehluh mek thu leh, ṭanpuina dîltute chu endik leh vek phawt an nih tur thu sawiin, "Ṭanpuina sumte hi bank account kaltlanga sem tur a nih avangin account nei lote tun aṭangin an inruahman a ngai," a ti.

West Tuipui bialtu MLA hnenah hian khaw hrang hrangte chuan tui lian vanga harsatna an tawhte ṭawngka leh ziakin an lo thlen a ni.