Central-in vbc. 134.58 a rawn pe ; Treasury-in sum tlêm an pe chhuak

Sorkar laipuia Ministry of Finance chuan nimin khan Mizoram tan cheng vbc. 134.58 a pe chhuak. Mizoram sorkar treasury-te'n pisa kai ní-ah ni sarih chhung sum an pek chhuah loh hnuah Aizawl South Treasury chuan nimin khan bill tlemtê, sum tam tham lo deuh hoah sum tlém a pe chhuak nia thu dawn a ni.

Ministry of Finance chuan nimin khan state 14 tan Post Devolution Deficit Grant (PDDG) sum a pe chhuak a, Mizoram pawh telin, Mizoram tana a pek chhuah zat chu vbc. 134.58 a ni.

Tarlan tawh ṭhin angin, sorkar treasury zinga sum pe chhuak hnuhnung ber, Aizawl South Treasury-in July 22, 2022 thleng khan sum an pe chhuak a, chumi hnuah sum an pe chhuak tawh lo. Sorkar pisa kài ní bikah July 25 aṭangin sum an pe chhuak thei lo.

Aizawl South Treasury aṭanga Vanglaini thudawn danin, nimin khan Finance department-in bill release ṭul an tih tlemte pek chhuah a ni a, hengte hi pawisa tam tham lo te te a ni hlawm.

Thu dawn danin, Mizoram sorkarin sorkar laipui aṭangin PDDG leh Share of Taxes (central-in chhiah a hmuh aṭanga state chan) a dawn leh hma chuan treasury-te tan sum pek chhuah ngaihna a awm rih lo. Post Devolution Deficit Grant chu thla tin sorkar laipuiin a pe a, Share of Taxes erawh chu pek hunbi bik a awm lo thung.

Finance leh Treasury lama official-te chuan, Mizoram sorkar hnathawkte hlawh atan thla khatah cheng vbc. 330 vel mamawh a ni a; chutih laiin, PDDG chu thla tin cheng vbc. 134.58 zelin sorkar laipuiin a rawn pek ṭhin avangin, Deficit Grant hi August thla atan rawn pe pawh ni se, sorkar hnathawkte hlawh pawh a daih dawn lo tih an sawi.

Mizoramin kum kal meka Post Devolution Deficit Grant a hmuh tawhah, April-August inkarah thla tin cheng vbc. 134.58 zel hmuh a ni a, thla nga chhungin vbc. 672.92 hmuh a ni tawh. Kum 2022-23 chhunga Mizoramin PDDG a hmuh tura ruahman chu cheng vbc. 1,615 a ni.

Sorkar kum kal mek 2022-23 chhunga sorkar laipuiin PDDG a pek chhuah tawhah thla khata ni 10 hma lamah vek a rawn pe chhuak a, a tlangpuiin ni 6-ah a pe ṭhin a, tun thlaah chuan ni 3-ah a pe chhuak a ni.