Mizoramin kawlphetha leina man Cheng vbc. 46 chuang a ba mek
Mizoram sorkar chuan kawlphetha a leina man hmun hrang hrangah cheng vbc. 46 chuang a ba mek a, kawlphetha man bá pek theih hun tur hriat a ni lo.
Power & Electricity department hotute chuan, tun hma aṭang tawhin kawlphetha man eng emaw zat an bat ṭhin thu Vanglaini an hrilh a, "Finance department aṭanga pawisa kan hmuh hian kawlphetha man ba kan pe ve leh mai ṭhin. Kawlphetha leina man bat hi thil thar a ni lo," an ti.
Hetih lai hian, prime minister Narendra Modi chuan power distribution company leh generating company-a kawlphetha man ba nei state-te chu a rang thei anga bá rûl turin a hriattir a ni.
Prime Minister chuan, state tam takin power distribution company leh generating company-ah leiba tam tak an neih avangin company-te'n sum lamah harsatna an nei chho tih sawiin, "Energy leh power sector-te hi India-in hma a sawnna tura chanvo pawimawh tak nei an ni. Hei vang hian sum lama harsatna an tawh mek chinfel a nih thuai theihna turin state-te'n an leibá an rulh vat a ngai," a ti.
Tarlan tawh angin, Joint Electricity Regulatory Commission for Manipur & Mizoram chuan Mizoram sorkarin rawtna a thlen angin April 2022 aṭangin Mizorama kawlphetha hman man a tipung a, a punna chu 6.78% a ni. Power tarrif thar angin April 1, 2022 aṭangin electric bill chhût a ni a, kum 2022-23 chhung hman tur a ni.