New Market building thar an nghakhlel
Aizawl New Market building ṭhiah a nih avangin thawmhnaw zuartute'n inzawrhna tur hmun mumal an nei lo mek a, in thar tur sak mek chu sa zo thuai turin sorkar an duh.
Vanglaini palaiin New Market ṭhiahna hmuna ṭhu ṭhin thawmhnaw zuarte a kawmnaah thawmhnaw zuarte chuan, New Market in thar sak zawh hun an nghahhlelh thu an sawi a, kum hnih vel thawmhnaw zawrhna tur hmun mumal nei loa an awm tawh thu leh sum tam tak an hloh tawh thute an sawi a ni.
Hmun mumal an nei lo
Kum 2020 July thla khan New Market building pui ber chu ṭhiah ṭan a ni a, thawmhnaw zuar ṭhin zingah secondhand zuar mi 180 vel leh readymade thawmhnaw zuar mi 156 vel an awm a, incheina dang zuar eng emaw zat an awm bawk.
Thawmhnaw zuartute chuan, kum hnih vel thawmhnaw zawrhna hmun mumal an neih tawh loh thu sawiin, "Secondhand zuar ṭhin zinga mi 10 vel hian bazarpuia inzawrh chhunzawm theihna tur hmun an nei a, a tam zawk chuan thawmhnaw zuar chhâwngte hnenah kan hralh chhâwng tlangpui," an ti a; a ṭhen chuan an chenna in bawr velah leh mimal hmun luah hawhin inzawrhna tur an insiam chawp thu an sawi.
Barzarpuia chawhmeh zuarte anga hulhliap zâr chawpa ṭhutna tur hmun an neih a rem ve loh avangin harsatna an tawh nasat thu an sawi a, "Chawhmeh zuarte hi chu mipui ni tin mamawh an ni," tiin, thîk chi an nih loh thu an sawi a ni.
Ṭhutna turah an ṭhu/ inzuar lo
In sak ṭhat a nih chhunga an ṭhutna atan sorkarin Bawngkawn AMC building leh Bawngkawn bazar chunga hmun a ruahmansak chu inzawrhna chi a nih loh thu an sawi a, "Kan enchhin tawh a, mipui an tam loh avang leh a hmun a kilkhawr avangin thawmhnaw ṭhutpui ngamna chi a ni loah kan ngai," an ti.
Sorkarin hmun a ruahmana an ṭhutna tur hmun chu ft. 3 bial velte a nih thu leh hnathawk an awm deuh reng ṭhin avangin inzawrhna atan hman chi-ah an ngai lo a, kal lam leh haw lamah sum tam tak an chawi thlâwn thei dawn niin an sawi bawk.
In sak zawh an nghakhlel
Mipui tamna hmuna ṭhutpui chia eizawng an nih avangin New Market main building thar tur chu sorkarin sa zo thuai se an duh thu an sawi a, "Eizawnna dang nei loa thawmhnaw zuar ṭhin eng emaw zat kan awm a, harsatna kan tawh hi a nasa tawh tak zet. Sum lâk luhna tur hmun ṭha kan neih ve loh avangin kan mangang tawh hlawm hle a ni," an ti.