August 10 velah hlawh pek beisei ; 'Pathian hian min hruai chhuak ngei ang' - Ruatkima
MNF adviser Lalruatkima, minister of state chuan nimin khan MNF Sub-Headquarters, Lunglei-in Saikuti Hall-a Leadership cum Media Training an buatsaihah thu sawiin, August ni 10 bawr velah sorkar hnathawkte July thla hlawh pek beisei a nih thu a sawi a; he hun harsa ata hi Pathianin a hruai chhuah ngei a beisei thu a sawi bawk.
Lalruatkima chuan, sorkar sum dinhmun siamṭha turin sorkarin theihtawp chhuahin ṭan a la mek nia sawiin, "Mipui tan thlaphànna tur a awm lo. Ni 10 báwr velah sorkar hnathawkte hlawh pek hman beisei a ni. Vawiin aia hun khirh leh harsa zawkah pawh min lo hruai kai tawhtu kan Pathian hian min hruai chhuak ngei ang tih kan ring a ni," a ti.
Sorkar sum harsatna chu tun hnai chauha thleng ni loin, Congress sorkar hun chhung zawnga hriat a nia sawiin Lalruatkima chuan, "Mi tam tak nunna suattu Congress sorkar zu zawrh pawh kha sum harsatna phuhrûkna tura zu chhiah an ît vanga zu zuar an ni," a ti a; sum harsatna thleng mek chu Mizoramah chauh a ni lo a, India ram state hrang hrangah pawh an buai hlawm hle niin a sawi.
MNF Adviser chuan, sorkar laipuia Ministry of Finance-in July 1, 2022 aṭangin CSS kalhmang a tidanglam a, PFMS kaltlanga sum pek chhuah zel tur a ni tih sawiin, "CSS implementing department-te pawh single nodal account (SNA)-ah sum dah zel tura tih an nih tâk vang a ni. Keini state chauh buai fâl bik kan ni lo tih hi mipui hriatah ka sawi duh a ni. Tun dinhmunah department hrang hrangte'n hmasawnna hna thawhna tur sum SNA-ah an kawl tam vanglai tak zawk a ni thei," a ti.
Congress sorkar lai pawhin sum harsatna a awm tih sawiin Lalruatkima chuan, Finance minister ṭhin H Liansailova'n 'Treasury aṭangin hlawh chauh pe chhuak, sorkar sum bâwm khâr a ngai lo ang' tia a sawi Vanglaini May 31, 2013-ah tihchhuah a nih thu a sawi a; "Kum thum chhung (2012-2015) ways & means-in RBI-ah vawi 118 pawisa pûk a ni a, kum 2012-13 aṭanga kum 2014-15 (November 1, 2014) thleng khan RBI-ah nasa takin sum an pûk a ni," a ti bawk.