ZPM chuan zirchian hnuah zel hma kan la ang - Lalduhoma

ZPM leader Lalduhoma chuan, Mizoramah kut hnathawktute thlai chìntir ringawt a, a hralhna lam ngaihsak zui si loh a tam avangin, thil eng pawh mipuiah zuar dawn se, zirchiannaa innghata hmalak a pawimawh thu leh, ZPM chuan zirchian hnuah zel hma an lak tur thu a sawi.

Lalduhoma hian August 2, 2022-a ZPM-in Tourist Lodge, Chaltlanga ‘Workshop on vegetable market’ an buatsaihah thu sawiin, "Kan ramah research base-a kan kal loh avangin kum 35 chhung kut hnathawktute loneih bànsan tura duh thlan tur kan pe tam lutuk tawh. An kut a durh thlàwn a, an thlan a far thlawn a, an kâwng a kham thlàwn hnem lutuk tawh. Thlai inchìntir ringawt a, a market ngaihsak zui loh a tam. Hetiang hi kan duh tawh lo a, research base-in ZPM chuan hma kan la a ni," a ti.

Thiamna bik nei mi 60 rual, kut hnathawktute din chhuahna veitu an kal khawm chu ropui a tih thu sawiin Duhoma chuan, "Ka hnukte pawh in tiulh a ni. Mithiam rual, mi dang tan luan chhuah duhna rilru pú mi heti zat in pungkhawm ka hmuh hian politic-a ka zuan luh hnuah ka hlim ber ní zinga pakhat a tlingin ka hria," a ti a; kum 35 chhunga sorkar tawhte'n an lo bum tawhte chu beidawng mai lo turin a chah.

Lalduhoma chuan, thil eng pawh tih dawnin hmathlir ṭha (vision) neih a ngai tih sawiin, "Ram hruai kan tumnaah vision a ngai a, dream mai mai a ni tur a ni lo. Kan vision chu a ngêlnghetin a tluantling tur a ni," a ti a; vision tluantling turin eizawngtu tan eizawnna tlak a pawimawh thu a sawi.

ZPM Leader chuan, vision chuan thil ṭha lo a thlen tur a ni lo tih sawiin, "Zu zawrh kha sum hmuh nan a ṭha viau mai thei, mahse, vantlang tan a ṭha lo. Kan bul ṭanna tur chu eng thil pawh mipuiah zuar dawn ila, research base a ni tur a ni. A kalkawng kan siam chin lo chu mipui hmaah kan dinpui tur a ni lo," a ti.