Naupang hmanga sumdawnna Pumpelh theih dan tur zirho a ni

World Day Against Human Trafficking pualin National Commission for Protection of Child Rights (NCPCR), State Commission for Protection of Child Rights (SCPCR) leh Serchhip DC pisa chuan nimin khan DC meeting hall-ah naupang hmanga sumdawnna pumpelh dan tur an zirho.

Zirhona kaihruaitu Serchhip DC Nazuk Kumar chuan, an district-ah human trafficking case awm rih lo mah se, engtik lai pawha thleng ve thut thei a nih avangin inbuatsaih lâwk a ngaih thu a sawi a, "Invênna leh a thlen palha ûm zuina turah mawhphurtu tam tak kan awm avangin a mawhphurtu department-a thawktute'n inpuahchahna ṭha tak kan neih a ṭul," a ti.

Mizoram chu mipui inpawhna leh inlaichìnna a ṭhat avang te, kohhran leh tlawmngai pawlte inpekna avangtein India ram hmun dangte nena huang khata dah theih a ni lo tih sawiin Nazuk Kumar chuan, "Child labour, bonded labour leh prostitution lamahte case kan nei mang lo," a ti a; ramri hnaiha awm a nih avangin international human trafficking lamah mit len nasat a ṭul thu a sawi.

Serchhip SP Stephen Lalrinawma pawhin thu sawiin, "Mizoramah kum 2000 aṭangin human trafficking case kan nei ṭan a, case kan ngah ber kumah case pasarih ziah luh a ni," a ti.

Zirhonaah hian NCPCR hotu Anshu Sharma-in 'Naupang hmanga sumdawnna laka inven dan' tih thupui hmangin kal khawmte a zirtir a ni.