Lirthei chesuala chuang mi pahnih zawng mek

August 2, Thawhlehni zan dar 6:30 vel khan Sihhmui leh Lengpui inkara Tlawng lei bulah mi pali chuanna car MZ-01 U-1162 chesualin, Tlawng luiah a tla lut a; car-a chuang mi pahnih chu dama an chhuah laiin, mi dang pahnih chu an awmna chin hriat a la ni lo a, zawn mek a ni.

Vanglaini thu dawn danin, car-ah hian a neitu C Lalfakzuala (39) h/o Rebecca Lallawmzuali leh a fapa Malsawmkima (10) bakah, Lalngaih­awma leh Mano Lalrin­hlua te an chuang a, Chaltlang Lily Veng vek an ni.

Lalngaihawma leh Mano Lalrinhlua-te chu kawngpuiah an vâk chhuak thei a, C Lalfak­zuala te pafa erawh chu nimin tlai thleng khan an awmna chin hriat a ni lo.

Chetsualna thlen zan leh nimin khan Chaltlang Lily Veng bakah, an ṭhen­awm vengte leh Sairang, Sairang Dinthar leh Sih­hmuia mi tlawmngai ṭha­hnem takin C Lalfak­zuala te pafa an zawng a; Tlawng lui kama awm Bairabi leh Hortoki YMA-te pawhin vènbûk an siam bawk.