Health & Family Welfare department-ah Kum 3 chhungin thawktu 688 lak a ni

Health & Family Welfare depart­ment hnuaia Directorate of Health Services (DHS), Directorate of Hospital & Medical Education (DHME) leh Zoram Medical College (ZMC)-a thawk turin kum 2019-2022 chhung khan mi 688 lâk a ni. Hetih lai hian, post ruak 710 a awm.

RTI Act hmanga zawh­na Health & Family Welfare department SPIO-in a chhàn danin, kum 2019-2022 chhung khan sorkar damdawi-ina thawk tur mi 688 lâk an ni a, chu'ng zinga 320 chu a ngheta thawk tura lâk niin, a bak zawng chu a nghet loa thawk tura lâk an ni thung.

SPIO tarlan danin, thawktu lâk tharte chu DHME hnuaiah a nghetin specialist doctor pasarih, a nghet loin staff nurse 25 leh group-D (PE) 10 an ni a, an vaiin mi 42 niin, Civil Hospital, Aizawlah dah an ni.

DHS hnuaiah a nghetin medical officer 38 leh UDC pali lak an ni. Contract co-terminus basis-in mi 13, muster roll co-terminus basis-in mi 16 leh National Health Mission (NHM) hnuaiah contract-in mi 183 lak an ni a; an vaiin mi 254 niin, damdawi-in hrang hrangah dah an ni.

DHS hnuaiah hian damdawi-in 23-ah medical officer post ruak a awm a; dental surgeon pasarih, assistant director panga, entemologist pakhat, pharmacist 53, laboratory technician 53, x-ray technician 58, health worker 18, opthalmic assistant 67, LDC 69, driver 47 leh IV Grade post ruak 178 awmin, a vaiin post ruak 579 a awm mek.

Kum 2019-2022 chhungin ZMC-ah thawktu mi 392 lak an ni a, chung zinga langsar zual deuhte chu - a nghetin professor pakhat leh contract-in mi pasarih, associate professor-ah a nghetin mi 10 leh contract-in mi pakhat; assistant professor tur a nghetin mi 16 leh contract-in mi pakhat; staff nurse tur a nghetin mi 72 leh nghet loin mi 50 lâk an ni.

ZMC atana thawktu lâk zawng zawng mi 392 zinga 271 chu a ngheta thawk tura lak an ni a, mi 121 chu contract basis-a lak an ni. Hetih lai hian, post ruak 127 a awm a; staff nurse 35, assistant professor 12, group D 38 leh post dang ruak 42 a ni.

ZMC-a thawk tura staff nurse lak mi 122 zinga 55 chu ZMC ni lo damdawi-in dangah dah an nih thu HFW department SPIO chuan a tarlang.
SPIO chuan, HFW department hnuaiah thawktu lak zung zung a nih loh chhan zawhna chhangin, "Sorkar sum indaih lohna avangin thawktu lak belh zung zung a remchang rih lo a, amaherawhchu, a ṭul zualna hmunah chuan thawktu lak ṭhin a ni," a ti.

Contract-a thawk tura lakte chu kum khat chhung zel atan inremna ziahpui an ni a, an thawh ṭhat dan azirin kum khat chhung zel atan an thawh hun chhung pawhsei theih a ni.