Online-a electric bill pek kawngah PE dept. in fimkhur turin mipui an chah

Power & Electricity engineer-in-chief F Lalrinpuia chuan, online hmanga electric bill peknaah fimkhur turin mipui a chah a; BBPS agent hrang hrang GooglePay (GPay), PhonePe, PayTM, BHIM, etc. hmangtein bill pek theih a nih thu a tarlang.

F Lalrinpuia chuan, online hmanga electric bill peknaah mipui bum tuma SMS hmanga thu thehdarh leh Whatsapp-a pawisa pekna tur link dil kual an awm ṭhin tih a tarlang a, "Hetiang hi department aṭanga tihchhuah a nih ngai loh avangin mipuite fimkhur turin kan inhriattir a ni," a ti.

SMS an dawnna phone number chu block zel tur te, pawisa pekna tur link-ah lut lo tur leh SMS/link thawntu phone number-te chu phone number 7832871956, 8575517333 leh 9436141511-ahte a rang lama hriattir turin E-in-C chuan a ngen bawk.

F Lalrinpuia chuan, online hmanga electic bill pekte system-ah a luh leh luh loh en nan bank transaction detail-te mamawh a nih ṭhin thu tarlangin, "Hei hi chu PE department phone number tarlanah thawn a him a ni," a ti.