Kumin kum chanve chhungin TB vangin Mizoramah mi 39 an thi

Kumin kum chanve, January aṭanga June thla chhungin Mizoramah ngawr natna, tuberculosis (TB) vangin mi 39 an thi a, TB vei zinga 91% erawh chu enkawl dam an ni thung.

National TB Elimination Programme, Mizoram report-a a lan danin, kumin January-June thla chhung khan Mizoramah TB vei mi 1,090 hmuh chhuah a ni a, chu'ng zinga mi 39 chu TB vangin an thi a, thi zinga mi 26 chu Aizawl district-a mi an ni.

Kumin kum chanve chhunga TB vei hmuh chhuah mi 1,090 zinga 191 chu HIV vei tel an ni a, TB pangngai aia tihdam harsa MDR-TB (multi drug resistant) vei mi 64 an tel bawk.

TB vei hmuh chhuah mi 1,090 zinga mi 67 chu zunthlum nei an ni a, mi 353 chu vaihlo zûk leh hmuam ti ṭhin niin, zu in ṭhin mi 148 an tel bawk. HIV vei, zunthlum nei leh zûk leh hmuam ti leh zu in mite'n TB an vei awlsam bik avangin endik ṭhin an ni.

TB vei hmuh chhuah tamna ber Aizawl district-ah mi 685 hmuh chhuah an ni a, Lunglei district-in dawtin mi 87 hmuh a ni. Mamit district-ah hmuh chhuah tlem berin, mi 17 hmuh a ni bawk.