KHAWTHLIR

Kiren Rijiju kâwm
Law & Judicial minister TJ Lalnuntluanga chuan nimin khan New Delhi-ah Union Law & Justice minister Kiren Rijiju chu a chenna inah a kâwm a, Mizoram Law & Judicial department mamawh leh ṭul dangte a sawipui. TJ Lalnuntluanga'n Champhai District Court sak dan tur leh department hmachhawp a sawite chu Kiren Rijiju chuan a ngaih pawimawh thu leh hmalakpui a inhuam thu a lo hrilh tih sorkar thuchhuahin a tarlang. Minister hi Law & Judicial leh EFCC department hotute'n an ṭawiawm a ni.

Project endik
Aizawl District Committee on Pradhan Mantri Jan Vikas Karyakram (PMJVK) chu nimin khan an chairman Dr Lalhriatzuali Ralte, bawrhsap hoin DRDA conference hall-ah an ṭhukhawm a, PMJVK hnuaia project duan chhinte an endik. Sorkar thuchhuah tarlan danin, PMJVK hnuaiah hian hnam tlém zawk (minority)-te zirna, hriselna leh thiamthil (skill development) lama tihhmasawn hna thawh ṭhin a ni.

Heroin man
Serchhip police-te chuan August 2, Thawhlehni zan khan Lalduhawmi (32) d/o Rallianzuali, Serchhip Saron Veng hnen aṭangin heroin gram 562 an man. Heroin hi international market-ah cheng nuai 280 vel hû a ni.

Lirthei tlân dan
Traffic SP Rodingliana Chawngthu chuan thupek chhuahin, August 6, 2022 (Inrinni) chawhnu dar 1 aṭanga tlai dar 6 inkarah Temple Square aṭanga Tennis Court lam panin lirthei tlân phal a ni dawn lo tih a tarlang. Tennis Court aṭanga Temple Square lam pan chu a pangngaiin an tlan thei dawn a, Congress Bhavan bul kawng chhuka tlân thlate chu Tennis Court lamah kal loin, Temple Square lamah kal tur a nih thu a tarlang bawk.