Lengpui Airport enkawl zui zel turin Mizoram sorkarin thutlukna a siam

Lengpui Airport chu Indian Air Force (IAF) kuta hlan tumna awm mah se, June 21, Nilaini tlaia chief minister Lal Thanhawla hoa Cabinet room-a official-te ṭhukhawm chuan Airport chu Mizoram sorkar kuta awm chhunzawm turin an rel.

Meeting-ah hian, Lengpui Airport enkawl turah thutlukna an siam bakah, Airport chhunga boruak tihdaih dan tur te, terminal building chei ṭhat dan tur te, zana tlawhtheihna ṭum theihna tur night landing chungchang te, runway kaihhnawih thilte leh airport enkawlna atana GAD Aviation Wing-a thawktu mamawh belh a nih thute sawiho a ni.

Lengpui Airport inhlan turah hian Mizoram sorkar leh IAF hotute chu October 1, 2015 khan an inbia a, mahse, Mizoram sorkarin an duh leh loh avangin inbiakna chhunzawm a ni lo.

GAD Aviation Wing hotute hnen aṭanga thu dawn danin, IAF hnena Lengpui Airport hlan hi chief minister Lal Thanhawla'n a duh lo a ni.

Hetih lai hian, Lengpui Airport chungchangah Mizoram sorkar leh Airport Authority of India chu an inbia a, mahse venhimna lamah an thu a inhmu lo. AAI-in airport an kuta a awm hnua state sorkar kuta security awm tura an tih chu Mizoram sorkarin a pawm lo.

Lengpui Airport hi December 12, 1998-ah hawn (commission) a ni a, a design hian zin veivâk lut leh chhuak 300 ve ve dâwl tura ruahman a ni. Tunlai hian ni tin zing veivâk mi 900 (lut leh chhuak) velin airport an hmang mek a; Air India, Jet Airways leh Indigo Airlines thlawhnate an service mek a ni.

Tunlai hian Regional Connectivity Scheme (RCS) hnuaiah Zoom Air, Deccan Charters leh IIC Technologies Ltd. ten flight operation ṭan tumin hma hma lak mek a ni.