HIV/AIDS donaa hmalakna thar

Mizoram State AIDS Control Society (MSACS) hnuaia HIV/AIDS dona kawnga hmalakna thar, Test and Treat Strategy tih chu nimin khan Health minister Lal Thanzara'n Aijal Club-ah a hawng.

Health Minister chuan, HIV/AIDS natnain Mizoramah kua a hreuh thûk hle tawh tih sawiin, "Kan hriat leh hmuh theih aia nasa hian min luhchilh mek. HIV/AIDS chungchangah kan ram hi dinhmun hlauh-awmah a ding mek a, Kristian state ni chunga India ram state zinga HIV/AIDS vei tamna ber dawttu kan ni a, thinlung leh tih tak zeta ṭangruala kan beih a ngai tawh," a ti.

HIV/AIDS do kawnga sorkar laipui policy duan thar, Test and Treat rang taka MSACS-in a kalpui chu lawmawm a tih thu sawiin Lal Thanzara chuan, "HIV enkawlna ART chuan he natna kai leh vei mekte tana khawvel nuam zawk a siam theih a ni," a ti a; Test and Treat hnuaiah HIV positive zawng zawngin ART a thlawna an dawn theih dawn avangin Mizorama HIV/AIDS dona kawnga rahbi pawimawh tak a ni thu a sawi.

Health secretary Lalrinliana Fanai sawi danin, Test and Treat hi World Health Organization-in kum 2015-a HIV/AIDS enkawl chungchanga inkaihhruaina a siam zûlzuia duan a ni. Policy hnuaiah hian HIV hrik pai zawng zawngte chu CD4 cell count eng zat pawh ni se, ART a thlawnin an dawng vek thei dawn a ni.