Court-in chiahpuam thubuai A ngaihtuah thei hrih lo

Gauhati High Court, Aizawl Bench chuan chiahpuam sumte sem dan tur ngaihtuah turin Aizawl DC hriattir tawh mah se, petition thehluttu a dam loh avangin thubuai hi ngaihtuah chhunzawm theih a la ni lo.

Sorkar ukilte hnen aṭanga Vang-laini thu dawn danin, January 6, 2013 khan Aizawl District & Session Court-a Chief Judicial Magistrate (CJM)-in chiahpuam sumte chu sem turin Aizawl DC a hriattir a; chumi hnuah CJM thutlukna chu Gauhati High Court-ah sawiselna (petition) thehlut an awm a ni. High Court chuan Mizoram sorkar hnenah CJM thutlukna chu an khinlet (appeal) loh chhan a zawt bawk.

Gauhati High Court thu ngaihtuah hian khatih laia DGP hoa police hotute leh sorkar ukilte chu an inhmuhkhawm a; sorkar ukilte chuan, CJM thutlukna chu appeal loh ṭha an tih zawk thu an sawi. Police hotute chuan sorkar ukilte thuràwn angin High Court-ah chhànna an thawn a ni. Chumi hnuah Mizoram sorkar chuan chiahpuam thubuai chungchangah special public prosecutor atan H Lalmuankima a ruat.

Gauhati High Court chuan thupek chhuahin, Aizawl DC chu Finance department nen ṭangkawpa chiahpuam sum sem dan tur ngaihtuah turin a hriattir a; thubuai chu May 22, 2017-ah ngaihtuah leh tura tih a ni. Mahse, petition thehluttu hian Court-ah a damlo inenkawl a ngaih thu sawiin, thla thum chhung vel nghak turin a ngen a, a ngenna chu remtihsak a ni.

Chiahpuam sum hi tun dinhmunah a pung nen cheng nuai 1,300 chuang a awm. Chiahpuam sumah an ta a tela ngaitu (claim-tu) zat hi depositor association lamin list an siam hnuah tihdanglam leh a nih avangin a zat chiah sorkar ukilte'n an hre thei lo a ni.