Aizawlah company secretary zirna hawn a ni

Institute of Companies Secretaries of India (ICSI) chuan, nimin khan Pachhunga University College (PUC) seminar hall-ah Mega Career Awareness programme an buatsaih a; a thlawna company secretary course zirna an hawng nghal.

PUC-a company secretary course zirna, ICSI Aizawl Study Centre kalpui tur hian PUC leh ICSI chuan nimin khan thawh dunna thuthlung, Mamorandum of Settlement an ziak bawk a; mega career aware-ness-ah hian Higher & Technical Education secretary Benjamina khuallian a ni a, ICSI president Dr Shyam Agrawal chu khual-zahawm a ni.

Benjamina chuan, company secretary lam zirna Mizorama hawn a ni chu Mizoram leh Mizote tan hmasawnna lian tak a nih thu sawiin, Mizo ṭhalaite'n an chhawr ṭangkai ngei a beisei thu a sawi.

ICSI hi kum 1968-ah Indian Parliament-in dan a pass anga din a ni a, company inrêlbâwlna hrang hrang enkawltu bera an hman ṭhin niin, Companies Act 2013 hnuaiah company, cheng nuai 500 hu bungrua/sum nei chin chuan an ruai ngei tur a ni.

ICSI hotute chuan nimin khan Aizawl Press Club-ah thuthar thehdarhtute an kâwm a; ICSI president Dr Shyam Agrawal chuan, ICSI hnuaiah zirlai 4,00,000 chuangin an zir tawh a, mi 50,000 vel an inzir chhuak tawh tih a sawi.

Dr Shyam Agrawal chuan, company secretary course chu India ram hman dangah zir man awm mah se, India hmarchhak state-ahte leh Jammu & Kashmir-ah chuan zir man a awm lo a, a thlawn vekin zirna pek tur a nih thu a sawi a;

Mizote zingah company secretary an la awm lo a, tunah zir mek mi pali an awm tih sawiin, Mizo ṭhalaite chu company secretary zir turin a sáwm.

Zawhna chhangin Dr Shyam Agrawal chuan, company secretary course zir chhuakte tan hna thawh turah buaina leh harsatna a awm ngai loh thu a sawi.

ICSI President sawi danin, Mizorama course an hawn tur hi chi hnih a ni a; Foundation course chu pawl 12 leh a tlukpui chin tan zir theih niin, Executive Programme an tih chu Foundation course zo tawhte bakah, direct-in graduate zo tawh chin tan zir theih a ni. Course hi March 31, 2018 thleng an hawng dawn niin an sawi bawk.