Kawlphethaa Mizoram hmasawnna tur sawiho

Sorkar laipuia Ministry of Power-a joint secretary AK Verma leh director KK Mishra chuan June 21, Nilaini khan chief minister Lal Thanhawla a pisaah an kâwm a; kawlphethaa Mizoram hmasawn dan tur an sawiho. Kawlphetha buaipuitute nen Cabinet room-ah meeting an nei bawk.

Chief Minister chuan, May 2017-a New Delhi-a a zin ṭuma Union Power minister Piyush Goyal hnena Mizoram kawlphetha dinhmun zir chiang turin high level delegation tír tura a ngenna a hlawhtling chu lawmawm a tih thu a sawi a, "Meeting hian rah ṭha a chhuah ngei ka beisei," a ti.

Power & Electricity engineer-in-chief L Pachuau chuan, Mizoram kawlphetha dinhmun leh mamawh te, power project leh scheme kalpui meka hna thawh chin te, hmabak leh harsatnate a lem nen a sawifiah a, sawiho nghal a ni.

AK Verma chuan, Power Grid Corporation of India Limited (PGCIL) leh NEEPCO aiawhte chu an hnathawh mekte a hun taka zawh a nih thei nan chak zawka bawhzui leh enfel turin a chah.

Meeting-ah hian P&E secretary H Lalengmawia bakah, PGCIL, Rural Electrification Corporation, NEEPCO leh National Hydroelectric Power Corporation (NHPC) aiawhte an tel a ni.