RBI-a sum pûk rulh a ni tawh ; Treasury khâr a ngai dawn lo ; OMB-in cheng vbc. 200 pûk a ni

Mizoram sorkar chuan Reserve Bank of India (RBI) aṭanga overdraft hmanga a sum pûk chu hun tiam chhungin a rûl a, sorkar treasury khâr a ngai dawn lo. Nimin kha overdraft hmang sum pûk rulh hun hnuhnung a nia thu dawn a ni. Hetih lai hian, Open Market Borrowing (OMB) hmangin cheng vbc. 200 pûk mek a ni bawk.

Tarlan tawh ṭhin angin, sorkar laipui chuan March 31, 2022 hma lama centrally sponsored scheme (CSS) sum a pek chhuah tawhte chu a neitu/hmangtu tur department (SNA) hnena pe chhuak vek turin state sorkarte a hriattir a; Mizoram sorkar chuan CSS sumte chu hmun dangah a pawhpên nasat avangin SNA-te hnena pek chhuah tur daih Reserved Bank of India (RBI)-a a account-ah a nei lo.

Mizoram sorkar chuan RBI-ah ways and means/special drawing facilities hmangin sum a pûk a, chu chuan sum pek chhuah tur a daih loh avangin overdraft hmangin a pûk leh bawk. Ways and means/special drawing facilities hmanga sum puk chu ni 90 chhunga rulh tur a ni a, overdraft hmanga pûk chu ni 14 chhunga rulh tur a ni thung.

Overdrarft hmanga sum pûk rulh hun hnuhnung chu nimin kha a ni a, Mizoram sorkarin a rulh hman loh chuan treasury khâr tur a ni. Mahse, Mizoram sorkar chuan overdraft hmanga sum a puk chu a rûl hman nia thu dawn a ni a, chuvang chuan treasury khâr a ngai lo.

Ministry of Finance chuan August 3, 2022 khan state 14 tan thla tina a pek chhuah ṭhin Post Devolution Revenue Deficit Grant (PDRDG) sum a pe chhuak a, Mizoram pawh telin, cheng vbc. 134.58 a rawn pe a ni.

Mizoramin PDRDG sum a dawn bakah hian August 2, 2022 khan Open Market Borrowing (OMB) hmanga sum pûk turin RBI kaltlangin security cheng vbc. 200 a lilám a ni.

PDRDG leh OMB bakah hian July 2022 chhungin Mizoram sorkarin chhiah a hmuh vbc. 64.35-te a hmu a ni. RBI-a sum pûk rulh a nih tawh bakah hian, sorkar hna a nghet loa thawkte hlawh pawh pek a ni dawn a, a ngheta thawkte hlawh chu Share of Central Taxes hmuh a nih hunah pek tum nia thudawn a ni.

Security lilàm hmanga sum pûk hi sorkarin rulh leh tura sum a pûkna chi khat niin, State Development Loan tih a ni a; hun tiam chhung awma pûk tur a nih avangin dated security tih ṭhin a ni bawk. Hetiang hi OMB hmanga kalpui a ni a, kum eng emaw zat liam tawh aṭangin sorkarin a kalpui ṭhin a, budget-ah pawh sum pûk tur hi ruahman lâwk a ni ṭhin.

RBI-in state sorkar tan sum pûk tur a lo zawng a, financial institution-te'n an chháng ṭhin. Kum khatah a pung vawi hnih rulh tur a ni a, kum 10 hnuah pawisa pûk zawng zawng rulh a ngai a ni.

Security lilám tur hian Finance Commi­ssion-in ruahmanna a siam leh bithliah angin Ministry of Finance phalna (consent) lâk ṭhin a ni a; thil a kal fel hnuah RBI-in state sorkarte security chu market-ah a lilám ṭhin a, a duh duhin an chháng ṭhin.

Hetih lai hian, Finance department chuan nimin khan thuchhuah siamin, tun hnaia CSS sum pek chhuah a nih avanga Mizoram sorkar sum dinhmun ṭhat loh chungchang an sawifiah a ni.