MRMC-in Chief Minister an kâwm

Mizoram sorkarin January 2022-a a din, Mizoram Resource Mobilization Committee (MRMC) member-te chuan nimin khan a vawi hnihna atan chief minister Zoramthanga a pisaah an kâwm a, an hmalak tawhna leh hmalak zelna turte an sawipui.

Sorkar thuchhuah tarlan danin, MRMC hian sorkarah rawtna hrang hrang an thlen tawh a, an rawtnate sorkarin ṭha taka a bawhzui ṭhin avangin CM hnenah lawmthu an sawi. An rawtna anga sorkar office-te bank account-a pawisa pung sorkar sum báwma chhun luh chu cheng vbc. 37 a tling tawh. Aizawl DC hnuaiah Mizoram Public Demand Recovery Act, 2001 kengkawhtu certificate officer turin Additional DC ruat a ni.

MRMC rawtna angin picnic spot, catering service leh spa-ahte Goods & Services tax (GST) lâkna atan mumal taka kalpui a nih theih nan Allocation of Business Rules, 2019 hnuaiah Tourism department kutah dah a ni. Agriculture, LSC leh periodic patta-te in hmuna leh (convert) dawna ram 30% emaw 40% emaw surrender ngai ṭhin eng emaw hun chhung atana tihtawp an rawtna chu bawhzui mek a ni bawk.

State-a leilung hausakna, GST lakna tur ni si, lak ngai lohna - lung, rawra leh a dangteah GST lak ni se tia an rawtnate chu sorkarin a bawhzui mek a, chak zawka bawhzui ni se an duh thu CM an hrilh.

Department hrang hrangte'n an sum hmuh (receipt) online hmanga pek theihna siam tur leh computerise system hmang tura an tihna chu department lamin an zâwm ṭha vak rih lo nia hriat a nih avangin chak zawka bawhzui ni se, an ti.

MRMC chuan, Aizawl leh Lunglei khawpui mipui tui tlan ber, Tlawng lui chu enkawl a ngai an tih thu sawiin, sorkarin Save Tlawng River programme a siam chu ṭha an tih thu an sawi a; mawhphurtute'n chak tak leh rah chhuah ṭha tak neia kalpui a nih theih nan tui bill aṭangin cess 5% lak ṭha an tih thu CM-ah an thlen bawk.

Chief Minister hian MRMC-te chu an hmalaknaah lawmthu hrilhin, hmachhawp hrang hrang sawipuiin, chak leh zuala hmalak a nih theih nan theihtawp chhuah a inhuam thu leh sorkar pawh a inhuam thu a hriattir.

MRMC hi an din tirh January 21, 2022 aṭangin vawi 9 an ṭhukhawm tawh a, consultation meeting vawi 3 an nei tawh bawk. MRMC-ah hian chairman chu H Rammawi a ni a, vice chairman chu Liansuama a ni.