Man tláwm zawka buhfai lei turin Congress MLA-in sorkar a ngen

Congress party MLA Lalrindika Ralte chuan, Mizoram sorkarin open market-a buhfai a leina man chu a san thu leh tuna leina aia tlâwm zawka lei theih a nih thu a sawi a; man tláwm zawka buhfai lei turin Mizoram sorkar a ngen.

Lalrindika Ralte hian nimin khan Aizawl Press Club-ah thuthar thehdarhtute a kâwm a; sorkarin buhfai a leina man a sang hle tih sawiin, "Hei aia tláwm zawk hian a lei theih a ni. Buhfai kan leina leh a chhehvela pawisa tam tak luang ral hi kan ram sum leh pai indaih lohna thlentu pakhat a ni," a ti a, sum dinhmun siamṭhat nan leh sum hloh a tlem zawk theih nan buhfai lei leh a chhehvela sum kal ral tihtawp vat a ṭul thu a sawi.

Buhfai leina man bithliahtu hi sorkar a ni chunga man to taka sorkarin buhfai a lei hi ṭul loa mipui sum tam tak khawhralna a ni tih sawiin Lalrindika chuan, "Tute'n emaw hlâwkpui viau mah se, ram sum dinhmun harsatzia ngaihtuaha man tláwm zawka lei ngei turin Mizoram sorkar ka ngen a ni," a ti.

Lalrindika Ralte sawi danin, Mizoram sorkarin FCSCA department kaltlangin Food Corporation of India (FCI)-ah buhfai a lei ṭhin a, sorkar laipuiin Mizoram tana state quota a pek bakah, a man to (economic cost)-in lei belh ṭhin a ni.

FCI aṭanga economic cost-a buhfai lei ṭhinna aia tláwmin open market-ah lei theih a nih avangin kum 2013 vel aṭangin sorkarin FCI aṭanga lei titawpin, open market aṭangin buhfai a lei a, tun thlengin lei chhunzawm a ni.

Open market-a buhfai lei man chu sorkarin a bithliah a, ZIDCO kaltlangin lei a ni ṭhin. Buhfai quintal khat Rs 2,750-a a lei laiin, quintal khat Rs 1,500-in mipuiah hralh a ni a, quintal khatah sorkarin Rs 1,250 zel a hloh ṭhin.

Kuminah January aṭanga June thlenga ZIDCO kaltlanga Mizoram sorkarin buhfai a lei tawh zat chu quintal 2,95,000 a ni a, sum sên zat chu Rs 81,12,50,000 (nuai 8,112.5) a ni. Thla ruk chhunga sorkarin sum a hloh zat chu Rs 36,87,50,000 (nuai 3,687) a ni.

Sorkarin buhfai lei leh hralhnaa thla tina sum a hloh zat chu Rs 6,14,58,333 (nuai 614.58) a ni a; kum khat chhunga a hloh tur zat chu Rs 73,75,00,000 (nuai 7,375) vel a ni.

Zawhna chhangin Lalrindika Ralte chuan, sorkarin tuna a leina aia tláwm zawka buhfai leina a awm tih a hriat leh hriat loh a sawi theih loh thu a sawi a, "Tunah kan puangzar tawh a, tláwm zawkin a lei theih tih sorkar pawhin a hre tawh turah ka ngai. Tláwm zawka buhfai lei leh lei loh chu sorkar thu thu a ni," a ti.