India-a ruihhlo hluarna district 272 zingah Aizawl, Champhai leh Kolasib a tel
Ministry of Social Justice Empowerment chuan India rama district hrang hrang zingah ruihhlo hluarna bikte thlang chhuakin, chu'ngah chuan hma la turin ruahmanna a siam. Ruihhlo hluarna district 272 thlan chhuah a ni a, Mizoram aṭangin Aizawl, Champhai leh Kolasib district-te a tel.
Ruihhlo hluarna district-ahte hian Nasha Mukt Bharat tih hming phuahin hmalak a ni dawn a, August 15, 2020-ah kalpui ṭan a ni ang. State tinte chu Social Welfare department secretary kaihhruai State Level Nasha Mukt Bharat Campaign Committee din tura tih an ni a, member atan department hrang hrang aiawh bakah, ruihhlo donaa thawk tlawmngai pawl leh sorkar hnathawk pension tawhte ruat tel tur a ni. Ruihhlo hluarna district-ahte DC kaihhruai committee din tur a ni bawk.
State level committee chuan action plan siamin, Ministry of Social Justice Empowerment-ah an thehlut ang a, senso ṭul zawng zawng chu ministry-in a tum ang. District bikah chuan a hranpaa hma an lakna atan Rs. 10,00,000 ṭheuh pek a ni dawn. Ruihhlo hluarna district-te chu Ministry of Social Justice Empowerment-in ram pum zir chianna an buatsaih aṭang leh National Control Bureau thil hmuh chhuah aṭanga thlan a ni. Nasha Mukt Bharat chungchang hi Ministry of Social Justice Empowerment chuan state hrang hrangte hnenah July 13, 2020 khan a thawn a ni.
Ruihhlo hluarna district-a hmalak dan tur Ṭhenkhat
• Sikul leh college tinah zirlai, zirtirtu leh nu leh pate tana awareness campaign buatsaih
• College-ah ruihhlo do kawnga hma la tur student club siam
• Ruihhlo ngaite rehabilitation centre/hospital-a hruaia zirtirna (counselling) pek
• Ruihhlo ngaite enkawlna leh inzirtirna hmanrua enfiah
• Zirna-in aṭanga metre 100 aia hnaia meizial zawrh phal lohna dan khauh taka kengkawh
• Social media hmanga ruihhlo ṭhat lohzia inzirtir
NE-a ruihhlo hluarna district
State District
Arunachal Pradesh 8
Assam 9
Manipur 9
Mizoram 3
Meghalaya 4
Nagaland 3
Sikkim 4
Tripura 8