ZLP-in bawlhhlawh sâwngbàwlna an tlawh 'Luiah bawlhhlawh nawr liam ṭhin a ni'

ZPM Legislature Party (ZLP) member-te chuan nimin khan an leader Lalduhoma, MLA hoin AMC-in an enkawl mek Tuiriala Aizawl Solid Waste Management Centre (SWMC) an tlawh a; bawlhhlawhte sâwng­bàwl mumal a ni lo a, a paihna hmunin a zawh tawh loh avangin bawlh­hlawhte chu luiah nawr liam ṭhin a ni tih an finfiah.

Lalduhoma chuan, bawlhhlawh paihna hmun tur ni miah loah, SWMC gate luh chiah aṭanga bawlhhlawh paih nghal a ni chu a ṭha lo tak zeta a hriat thu sawiin, "Kawng sirah bawlhhlawh an chhêk mai mai a, kal harsa khawpin a awm. Bawlhhlawh nawr liam­na luikawr hian Tuirial a fin a; kan lui dunga bawlhhlawh paih lo tura min zirtirtu ber sorkar hian lui dungah bawlhhlawh a nawr liam hmiah hmiah a, a pawi hle a ni," a ti.

District khawpui pangaah SWMC siamna atan cheng nuai 60 ṭheuh pein sorkarin hma a lâktir tih sawiin ZLP Leader chuan, "Pakhat mah a la function lo a, building pawh pakhat mah a la ding lo," a ti a; chak zawka hma lak a nih loh chuan leilungin a tawrh zel dawn thu a sawi.

Lalduhoma chuan, miin in an sa a, in an ṭhiat a, ipa khung mai theih loh, lirthei liana phurh tham mi pakhat pawhin paih turte an nei tih sawiin, "Paihna hmun tur sorkar hian a buatsaih reng reng lo. Sorkar berin a buatsaih miau loh chuan a rûkin zanah kawngpui sirahte an paih a, kawngpui a tiṭawpin a tibawlhhlawh ṭhin. Sorkar hian a tih tur hi a ti lo hle a ni," a ti.

ZLP secretary Dr Van­lalthlana chuan, SWMC chu an veina a rei tawh thu sawiin, "Assembly session-ah pawh kan sawi fo tawh a, tunah hian enkawltu nei lo ang maiin a awm," a ti a; SWMC chu UDPA-in AMC hnenah March 8, 2021-ah a hlan tawh thu leh tunah chuan enkawltu nei lo ang maia a awm thu a sawi.

Mipuite bawlhhlawh thliar hrantir an nih laiin SWMC-ah thliar mumal a nih loh thu sawiin Dr Vanlalthlana chuan, "A remchanna apiangah an paih mai mai tawh a ni ber. Bawlhhlawhte hi luikawr lamah paih liamin, lui tui leh nungchate tana hlauhawm thei dinhmun­ah a ding niin kan hria a, ennawn a ṭul hle," a ti.

ZLP tarlan danin, SWMC-ah hian bawlh­hlawh ṭawih thei leh thei lo paihna hmun siam a ni a, tun dinhmunah bawlhhlawh paih theih a ni tawh lo. Bawlhhlawh ṭawih thei sawngbawlna hmun chu a kawngah bawlhhlawh paih a tam lutuk avangin tlawhpawh mumal theih a ni tawh lo bawk.