Pípu zai thiam ber C Lalbiaknii

Art & Culture department-in Mizoram pum huap Pípu Zai Intihsiak 2022 an buatsaih chu nimin khan Vanapa Hall-ah khâr a ni a, Art & Culture minister R Lalzirliana'n a hmanpui. Intihsiakah hian C Lalbiaknii, Ainawn Veng chu pakhatna a ni.

Pipu Zai Intihsiakah hian kum 14 chin chung lam mi 31 an tel a; pakhatna C Lalbiaknii'n lawmman Rs 30,000 a dawng a, pahnihna Ngurthansanga, Khawruhlianin Rs 20,000 leh pathumna Lalrinmawia Chawngthu, Durtlangin Rs 10,000 dawngin, trophy leh thuchei an dawng vek bawk.

Intihsiak khârna inkhawma khuallian R Lalzirliana chuan, khawvela hnam ding chhuakte chu an hnam nunphung vawng him tlattute an nih thu a sawi a, "Mahni hnam zia chawi nun nachang hre lo chu hnam bo leh hnam ral, an vela hnam dangte chîm ral leh lem zawh an ni ṭhin. Mizote pawh hnam nunphung vawn him leh chawi lâr kawngah kan ṭhangharh ve ta hi a lawmawm hle," a ti.

R Lalzirliana chuan, hnam humhalhnaa pawimawh leh Mizo anga khawvel hriata inpho chhuahna atana pawimawh ber zinga pakhat chu pipu zai a nih thu a sawi a; rimawi lama changkan zelna atan pipu zai chawisana chawinun zel a ṭul thu a sawi bawk.