Covid-19 vanga thi mi pakhat awm belh

August 3, Nilaini khan Mizoramah swab sample 907 endik aṭangin Covid-19 vei mi 255 hmuh chhuah a ni a, positivity rate 28.11% a ni. Nimin khan hripui vei dam tawh mi 175 chhuahtir an ni a, Covid-19 vangin mi pakhat a thi.

Nilainia hripui vei hmuh thar mi 255-te chu mipa 123 leh hmeichhia 132 an ni a; rapid antigen test hmanga hmuh chhuah vek an ni.

Covid-19 vei Vanlalhruaitluanga (27), Durtlang chu nimin chhun dar 12:45 khan State Referral Hospital-ah a thi a, hripui vanga thi 711-na a ni. Amah hi Covid-19 positive a ni tih August 3, 2022 khan hmuh chhuan a ni a, natna dang nei tel a ni.

Nimin khan hripui vei dam tawh mi 175 chhuahtir an ni a; district tina chhuak zat chu - Lungleiah mi 69, Aizawlah 29, Mamitah 22, Serchhipah 17, Saitualah 15, Champhaiah 10, Khawzawlah pali, Kolasib-ah pathum leh, Siaha, Lawngtlai leh Hnahthialah pahnih ṭheuh a ni.

IDSP record angin, Mizoramah Covid-19 vei 2,33,542 hmuh chhuah a ni tawh a, mipa 1,08,766 leh hmeichhia 1,24,776 an ni a, mipa aiin hmeichhia 16,010-in an tam zawk. Nimin tlai dar 5 thleng khan mi 2,31,715 (99.22%) chhuahtir an ni tawh a, mi 711 (0.30%) thi tawhin, enkawl mek mi 1,116 (0.48%) an awm.

Kum 2011 chhiarpui angin, Covid-19 vei hmuh tawh 2,33,542 chu state mipui zat aṭangin 21.29% a tling a; mi 1,000 zelah positive 212 an awm tawh ang a ni a, hripui vangin mi 1,00,000 zelah mi 64 an thi tawh ang a ni.