Sorkarin sum harsatna a sawifiah

Finance department chuan nimin khan thuchhuah siamin, tun hnaia centrally sponsored scheme (CSS) sum pek chhuah a nih avanga Mizoram sorkar sum dinhmun ṭhat loh chungchang a sawifiah.

Finance department chuan, sorkara a nghet loa thawk - muster roll leh workcharged-te hlawh chu August 5 (vawiin) hian pek chhuah vek tum a nih thu a tarlang a, "Pension leh sorkar hnathawk hlawhte pawh August 10, 2022 velah chhuah a tum a ni," a ti.

Sum harsatna inṭan dan tarlangin Finance chuan, "Kum 2019-20 tàwp lam aṭanga 2020-21 chhunga kan sum dawn tura ngaih dawn loh tam tak a awm a, a hlawm lian chin ringawt pawh cheng vbc. 2632.58 a ni. Hemi nghawng hi kan la tuar mek. Heng hun lai hi Covid hri hluar vanglai a ni a, central aṭangin sum faia ṭanpuinate kan dawng ve bawk a, nimahsela, cheng vbc. 100 pawh a tling ṭha ṭhum lo," a ti a; Covid vanga ṭanpuina dawn chu Mizoramin sum a hmuh tur a dawn tâk si loh nena khaikhinin a beitham hle niin a tarlang.

Finance department chuan, Covid-19 léng vangin ruahman lâwk ni loa sum hmanna a tam hle nia sawiin, "Covid damlo enkawlna atana kan damdawi-in leh thawktu neih sate'n dâwl zo loin, Covid damlo enkawlna bik atan covid care centre hrang hrang te, voluntary worker te, test-na khawl bun nan te, test-na hmanrua, re-agent leh PPE lei nante leh care centre-a ei leh in buatsaihna atante tam tak hman a ni," a ti.