KHAWTHLIR

Science Congress
Science Teachers' Association Mizoram leh Champhaia Samagra Shiksha chuan nimin khan Champhai Kahrawt Venga Education Training Hall-ah Champhai khawpuia zirna-in hrang hranga headmaster leh science zirtirtute tan 'Workshop on Science Congress 2022' an buatsaih a, sikula thawk mi eng emaw zat an tel a ni.

Sipai lâk rûnpui buatsaih dawn
Agnipath scheme hnuaiah October 4-9, 2022 chhungin Rajiv Gandhi Stadium, Mualpuiah sipai lâk rûnpui neih tur a ni a, dil tumte tan www.joinindianarmy.nic.in ah vawiin aṭanga September 3, 2022 thleng inziah luh theih a ni.

Mizo ṭawng zirho
Nimin khan Lawngtlai DC pisaa thawk, file khawihtu (dealing clerk)-te pualin DC conference hall-ah 'Mizo ṭawng ziah dan' zirhona buatsaih a ni. Zirhona hi additional DC James Miahlung-in a kaihruai a, Lawngtlai College-a Mizo department assistant professor David H Zothanpuia'n thil pawimawhte a zirtir. Lawngtlai DC pisa hian hriattirna leh thupekte a theih chin chinah English, Mizo leh Lai ṭawngtein a tichhuak ṭhin a ni.

BLO-te tan training
Kolasib district election officer John LT Sanga, district bawrhsap hoin nimin khan DC conference hall-ah Kolasib leh Serlui assembly constituency-a booth level officer (BLO) 63-te tan training buatsaih a ni a; inthlanna kaihhnawiha Election Commission of India-in kalphung thar a siamte an inhrilhfiah a ni.

Vawk insurance
Mizoram State Rural Livelihood Mission (MzSRLM), Serchhip district hnuaia self help group (SHG) member-te tan nimin khan Serchhip P&E Veng YMA hall-ah vawk insurance chungchang zirho a ni a, MzSRLM project director Malsawmtlauanga'n a hawng. Training-ah hian National Insurance Company mithiamte'n SHG member 41-te chu vawk insurance tih dan an hrilhfiah a ni.

Heroin man
Sangau police-te chuan August 3, Nilaini khan South Lungpher khuaah Sangau ambulance-a chuang mi pahnih hnen aṭangin heroin (No. 4) gram 172 an man a, a neitua puh K Lallungkhama (60) s/o Thawngvunga (L), Sentetfiang leh H Zoenga (38) s/o Hailua (L), Sangau-I (lirthei khalhtu)-te an man. Heroin hi international market-ah cheng nuai 86 hû a ni.

Khapna thupek
Serchhip DC Nazuk Kumar chuan nimin khan Serchhip district-ah hmun dang aṭanga vawk leh vawk kaihhnawih thil lak luh leh Serchhip district aṭanga thawn chhuah khapna thupek a tichhuak. Vawk damlo talh leh hralh khap a nih thu leh, vawk suat duh tan AH&Vety department-ah phalna lak hmasak tur a nih thu a tarlang bawk.

Ram dang bike Lungleiah khap
Lunglei bawrhsap Kulothungan A chuan, Lunglei district-ah sorkar phal loh ram dang (foreign) bike khalh leh hman a khap a, thupek zâwm lote chu Motors Vehicle Act tlawhchhanin hrem an nih tur thu a tarlang.