Governor-in zirlai lawmpui

Governor PS Sreedharan Pillai chuan, harsa tak chunga HSSLC 2020 result chhuaka arts-a pariatna, Vanlalvenhimi (17) d/o Lalfakliana, Durtlang North hnenah nimin khan Raj Bhavan-ah lawmpuina a hlân.

Larsap chuan, Vanlalvenhimi'n lehkha zir chungin a mawhphurhna dang, a nu leh pate hna thawka chhuah hlàna in chhung khawsak enkawl leh a naute enkawl hna a thawk tel ṭhin chu ropui a tih thu sawiin, "A mawhphurhna zawng zawng lehkha zir loh phah nan hmang lo a, hlawhtlinna ropui tak a chang hi India ram puma zirlaite tan entawn tlak a tling a, a chhuanawm tak zet a ni," a ti. Miin tumruhna leh taimakna a neih phawt chuan hlawhtlinna a sual chhuak thei tih Vanlalvenhimi aṭangin a chian thu a sawi bawk.

Vanlalvenhimi hian Durtlang HSS aṭangin HSSLC a pass a, B.A zir tura a thlàwna admission tihsaktu Hrangbana College-ah a zir chhunzawm ang.