Health immersion training buatsaih

National Health Mission (NHM), Mizoram leh ECHO India chuan nimin khan Floria Hotel-ah Health department hotute tan 'Immersion training' an buatsaih a, Health & Family Welfare minister Dr R Lalthangliana’n a hawng. Minister chuan, damlo enkawl leh mipui tana rawngbawlnaah technology a pawimawh thu a sawi.

Dr R Lalthangliana chuan, mipui, a bikin mi harsa leh dinhmun hniam zawka awmte hnena hriselna endik leh enkawl a, hriselna ṭha tak nen an awm theihna tura hmalak chu Health department mawhphurhna pawimawh ber a nih thu a sawi a, "Hemi tihlawhtling tur hian Health department-a thawkte thiamna tuai hriam leh an inrintâwkna tihngheh a, an hnathawhnaa harsatna awm theite hneh taka hmachhawn thei tura inbuatsaih a pawimawh," a ti.

NHM mission director Dr Eric Zomawia pawhin thu sawiin, technology hmasawn zel ûm pha chung leh hmang ṭangkai chunga Mizorama hriselna tihhmasawn leh hmalakna tihchangtlun a pawimawh thu a sawi.

ECHO hmang hian doctor, nurse, accredited social health activist (ASHA) leh community health worker-te'n hriselna endik leh enkawl hna awmze nei leh felfai zawka an kalpui theih nan zirchianna kalpui a ni a; kum 2019 khan Ministry of Health and Family Welfare nen MoU ziakin, national healthcare programme eng emaw zatin an chhawr mek niin sorkar thuchhuahin a tarlang.