Kum 9 chhungin eirukna vangin Mi 1,500 chuang hrem an ni - CM

Chief minister Lal Thanhawla chuan kum kua sorkarna an chan chhungin eirûkna vangin sorkarin hreh tak chungin mi 1,500 chuang lakah hremna a lek thu a sawi.

Ningania Serchhipa District Research Officer pisa a hawnnaah thu sawiin Lal Thanhawla chuan, "Eirute hrem duh loah sorkar hi sawi a ni ṭhin. Mahse, thubuaiin Court a thlen hian sorkarin thu a nei tawh lo. Kum kaw chhungin hreh tak chungin sorkarin mi 1,500 chuang chungah eirukna thilah kut a thlak a, sorkar ṭha ka duh avangin hengte hi kan tih a ngai a ni," a ti.

CM Hawla chuan, sorkar hnathawk leh pisate chu dawr nuam tak an ni tur a ni tih sawiin, "Mipui tana kan hnathawhte hi a langtlangin, kan thil tih a mawh leh mawhphurna a bik takin sum leh pai enkawlna lamah kan la tur a ni a, hetiang zawnga sorkar kal hi kan duh dan a ni," a ti a; hun vawn dik kawngah sorkar hnathawkte'n hma an sawna a hriat thu a sawi.

Chief Minister chuan, hmasawnna ṭha nei turin ruahmanna felfai tak neih a pawimawh tih sawiin, "Ruahmanna ṭha nei turin statistics leh thil reng reng chhinchhiah hi thil tul leh hmanraw pawimawh ber a ni. Ruahmanna ṭha, felfai leh changtlung tak hi statistical data-ah a innghat. Vawiina he office pawimawh tak kan hawn hian district mai ni lo, Mizoram hmasawnna turah kan hlawkpui ka ring," a ti.

Serchhip district chu ram laili a nih avangin kawng hrang hrangah duhsakna an dawn thu sawiin Lal Thanhawla chuan, hmasawnna hi neitu rilru pua dawngsawnga hmuak thiam turin district mipui a chah a ni.

Inkhawm hi Planning secretary Dr C Vanlalramsanga'n a kaihruai a, Planning minister Lalsawta pawhin thu a sawi.

Serchhipa DRO pisa hi kum 2013-a hawn niin, building thar sak hna chu November 2015-ah ṭan a ni a, April 2017-ah sak zawh a ni. Office a dung hi ft. 82 leh a vâng ft. 30 a ni a, a floor area chu square ft. 4,979 a ni.