Martarte kha Mizo zawng zawng tana martar an ni - Zoramthanga

MNF president Zoramthanga chuan nimin khan Mizo Hnam Rûna inkhawmah thu sawiin, zalenna an sual laia Mizoram tana martara thi zat dik tak hriat chian theih a ni lo tih a sawi a, "Martarte kha Mizo zawng zawng tana martar an ni," a ti.

Zoramthanga chuan, Laldenga (L) hoin Mizoram zalenna an sual a, independence an puang tih sawiin, "Mizoram tana martar thite kha a zat dik tak hriat chian fak theih a ni lo a, mi 2,000 aṭanga 3,000 inkar vel an nih kan ring," a ti a; inremna a awm hnua an hawin martarte ruang leh ruhte an hmuh theih ang ang an hawn tih a sawi.

'MNF-in ruhro politics an kalpui' tia mi ṭhenkhatin an sawi chungchangah Zoramthanga chuan, "An thih chhan kha Mizo hnam tana zalenna suala thi an nih avangin, min dotute tan chuan a hnawk tham em bawk a ni," a ti.

MNF President chuan, hnam tana martarte chu politics loah pawh, hamṭhatna hrang hrang atan hmanruaah hman theih a nih thu a sawi a, "An thih chhan kha Mizote zalenna thuthlung a nih miau avangin, thil dang hmanruaah pawh a hman theih vek a ni," a ti a; hnam tana martarte thihna chuan Mizote thinlungah thu a la sawi zel dawn niin a sawi.