Online-a thil leiah fimkhur turin chah

Mizoram police-a Public Relations Officer (PRO) chuan thuchhuah siamin, internet online hmanga thil zawrh leh lei kawngah inbumna a awm ṭhin tih an tarlang a, mipuite fimkhur turin an chah.

Police thuchhuah chuan, WhatsApp leh Facebook-a Buy and Sale group-te hi misual ṭhenkhatin mi bumna remchangah hmangin, mi bum tur an zawng ṭhin nia sawiin, "Mi ṭhenkhatin an thil leite to zawka hralh leh beiseiin social media Buy and Sale group-ahte an zuar leh ṭhin a, misual ṭhenkhatte'n an thil rûk leh dan loa an thil neihte awlsam taka tihral nan an hmang ṭhin bawk," a ti.

Mipui hnena police ngenna
1. Thil man tláwm uchuak taka zuar an awm chuan inbumna emaw, mi thil rûk leh police case neite an ni thei. Lei hmain bêl chiang hmasa la, market price nen a inthlauh lutuk chuan zir chiang loin chah/lei ngawt suh.
2. Online-a bungrua zuartu chu pawisa emaw bungrua emaw i pek hmain amah hriat chian hmasak tum ṭhin ang che. A contact number bakah a personal information/business information hriat chiana chhinchhiah ṭhin tur. A hnuah i thil lei vanga buaina (police investigation) i neih palh pawhin amah hriat chhuah a har loh phahin buaina lakah i fihlim phah thei ang. Fake account/identity hmangin bungruate (thil ruk/dan loa thil neihte) a zuar ru thei a ni tih hre reng ang che.
3. A tláwm lutuk a ni tih hre reng chung leh mi thil rûk sa tih hre reng chunga i lei a nih chuan IPC Section 411 hmangin a rutu nen ang khat renga hrem theih a ni.
4. Buy and Sale group hrang hrangah mobile phone lei/inthleng (swap) kan uar em em a, hei hi rûkrute tan an mobile ruk tihralna awlsak tak a ni. Mobile thar i lei a nih chuan sealed pack a ni em tih chian hmasa ṭhin ang che. Secondhand mobile i lei dawn chuan - cash memo, phone box, original charger leh hmanraw dangte a hralhtu i dil tel ṭhin dawn nia.