CM-in Serchhip Auditorium a hawng

Serchhip Auditorium sak thar chu nimin khan chief minister Lal Thanhawla'n a hawng. He auditorium hi Mizorama auditorium lian bera ngaih a ni a, cheng nuai 2126.01 sênga sak a ni.

Chief Minister chuan, sorkar policy leh programme atan a hun leh boruak awm mila mipui mamawh leh duhte phuhru tura hmalak a ṭul thu sawiin, "Rambuai thim chhah karah khatih lai khan remna leh muanna chu kan policy ber a ni a, remna leh muanna kan neih hnuin eizawnna ngêlnghet mipuiin an neih theih nan leh in leh lo ṭhate an neih theih nan NLUP leh in chung tur rangva sem programme duan chhuah leh a ni," a ti.

Champhai leh Kolasib-a doctor indaih lohna leh doctor insawn chungchanga thil thleng chu pawi a tih thu sawiin Lal Thanhawla chuan, "Mite tana harsatna siam hi ringtute nunah a bet lo nia ngaih a ni," a ti a; doctor sawn chungchanga Serchhip JAC-te hmalakna chu a Kristian hle tih sawiin, lawmawm a tih thu a sawi.

Chief Minister chuan, Serchhip Auditorium thar, Mizorama auditorium ṭha ber leh lian ber nia ngaih hawn a nih tak avangin bial mipuite a lawmpui thu a sawi a; Serchhip bial chu bial entawntlak ni zel turin a sáwm.

Serchhip Auditorium hi kum 2009-ah sak ṭan a ni a, hun eng maw chen sak a nih hnuah contractor-in a sak ṭhat loh vangin a contract tihtawp a ni. November 2014-ah contractor thar hnenah pek niin, sak chhunzawm a ni.

Auditorium sakna tur sum cheng nuai 2126.01 chu Ministry of Urban Development aṭanga hmuh a ni a, implementing agency chu NBCC Ltd. niin, dodal department chu UDPA a ni.

Serchhip Auditorium building hi Mizo chhiara chawng thum a ni a, VIP lounge, office, refreshment room, exhibition hall, meeting hall pahnih, mi 1,000 lenna auditorium-te a awm.