Inbumna laka fimkhur turin mipui chah

Mizoram Police chuan thuchhuah siam­in, sumdawnna lem leh inbumna lakah fimkhur turin mipui an chah a, "Tunlai hian Mizoramah company ṭhenkhat, pro­duct nei lo leh product zuar ni lo, hlâwkna an hmuh theihna tura scheme holam tê tê siam a, joining/scheme subscription fee atan mipuite sum dah (deposit) tira sum veivirtir vel (money circulation scheme) an chhuak mek," an ti.

Police thuchhuah chuan, company-te kal­phung ber chu Youtube video clip ‘view’, ‘like’, ‘subscribe’ leh online internet task dang aṭang leh company member log-in tawhte'n an hnuaia downline member an hmuh tam dan ang zela hlâwkna pek ṭhin a nih thu a tarlang a, "Heng ang chi company hi zir chian niin, dan loa thil ti eng emaw zat hmuhchhuah tawh a ni," a ti a; thil dik lo tite chu hna thawk zui lo tura tihtawp zel an nih thu a tarlang.

Mizoram Police tar­lan danin, company ṭhen­khat chuan an bum tur mipuite’n an rin theihna turin sorkara inziah luhna (registration) a hmingin an nei ṭhin a, mahse, an thil tih ang tih theihna tur phalna erawh an nei lo. An thil tih dan chu danin a khap thil a ni a, hrem theih an ni. Hetiang inbumnaah hian mi pakhatin hloh tam lo mah se, mipui sang télin an hloh belh khawm chu a tam hle ṭhin. Hetiang chungchanga hriat chian duh nei chuan SP(CID Crime) hnuaia Economic Offences Wing-ah phone no. 03892333741 /2335753/9612081851-ahte zawh theih a ni.