Cabinet thutluknaah MPC an lawm

MPC party chuan thuchhuah siamin, Lengpui Airport chu Indian Air Force kuta hlan lo a, Mizoram sorkar kuta awm zui zel tura Cabinet meeting-in thutlukna a siam chu lawmawm an tih thu an tarlang.

MPC thuchhuah chuan, "Mizoram sorkarin IAF kuta Lengpui Airport hlan tuma hmalakna thui tak a kalpuinate remti loa eptu party-te'n nasa taka kan dodal hnuah, tun hnaiah Cabinet meeting-in Mizoram sorkar kuta awm chhunzawm tura thutlukna fel tak a siam hi lawmawm kan ti tak zet a ni," a ti.

Lengpui Airport atan Brig. T Sailo kaihhruai PC sorkarin bul ṭanin, hmalakna thui tak a kalpui tawh nia sawiin MPC chuan, "Kan sorkar tawh loh hnu hun eng emaw chen hlamchhiah a nih hnu leh siam puitlin tuma hmalakna a awm tawh loh hnua Congress leh MPC party-te'n sorkar inṭawm an siam laiin, PC minister-te'n siam chhunzawm a nih theih nan theihtawpa an beihna azarah vawiin dinhmun hi kan thleng thei ta a ni," an ti a; lawmawm an tih thu an sawi.

MPC party chuan, kum 2018-a Assembly inthlanpui awm turah an thurualpuite nen hnehna changa sorkarna an siam a nih chuan Lengpui Airport leh Aizawl khawpuite awmze nei leh changtlung zawka an siam thar dawn thu an tarlang bawk.