June 30, 2017 zan dar 12 aṭangin GST hman a ni dawn - Lalsawta

Finance minister Lalsawta chuan, Goods & Service Tax (GST) chu India ram pumah June 30, 2017 zan dar 12 aṭangin hman ṭan a ni dawn tih a sawi.

Nimina Congress Bhavan-a inkhawma thu sawiin Lalsawta chuan, GST chu bungrua leh thâ thawh hmanga sumdawnna ang chiah lak a ni dawn tih a sawi a, "June 30 zan dar 12-ah India ram pumah hman a ni dawn a, GST aṭanga sum lutte hi Central sorkar leh state sorkarin a insem ṭhin dawn a ni," a ti.

Minister PC Lalthanliana pawhin thi sawiin, "Indian Constitution-in dan ang takin CAG hi a din ni mah se, an report-ah hian felhlel a awm ṭhin a, CAG report hi a lan dan ang thuak a ni lo," a ti. Social Welfare department hnuaia tar pension chungchanga CAG report pawh chanchinbu ṭhenkhatin, tar pension-ah a hman lohna turah cheng nuai 148 hman a ni tih an chhuah chu a sawifiah.

PC Lalthanliana sawi danin, tar pension chu NSAP hnuaia kalpui niin, kum 1995-ah miretheite ṭanpuina tura duan a ni a, mi harsa leh châwmtu chhungte nei lo tana duan niin, BPL chhungkua tih a ni kher lo. Kum 2007-ah Indira Gandhi National Old Age Pension Scheme tia thlak a ni a, BPL chhungkuaa mite chauh dawn tura tih niin, kum 2011-ah kum bithliah pawh 60 chinah tih a ni. Tar pension chu a dawng thei chin BPL chhungkuaa mi tih ni mah se, guideline leh Supreme Court thu angin, BPL list-a awm lo pawh pek an ni.