Rilru lama harsatna neite enkawlna tur hawng

Volunteers for Community Mental Health (VOLCOMH) hmalakna thar, rilru lama harsatna nei leh tleirawlte enkawlna Mental Health Day Care chu nimin khan minister Lalsawta'n a hawng.

Lalsawta chuan, khawvelin hma a sawn chak ang bawkin sualna a pung ve zel tih sawiin, "Aizawl pawh khawpui dangte ang bawkin khaw-tlang leh chhungkaw nun tibuaitu sualna a lut ve zel a. Khawpui nunah chuan veng khata cheng hote leh ṭhenawm khawvengte takngial pawh intlawhpawha inhriat vek sen a ni lo," a ti a; rilru lama harsatna neite tana VOLCOMH hmalakna chu fakawm a tih thu a sawi.

Mental Health Day Care hi tleirawl, a bik takin pawl 11 leh 12 zirlai, rilru lama harsatna neite ṭanpuina tura duan a ni.

Hmalakna hmasa atan sikul pali - JL HHSS, Synod HSS, Oikos HSS leh Mamawii HSS-te thlan a ni a; heng sikul paliah hian pilot project anga kalpui tum a ni. Kumin July thla chhungin sikul palia zirlaite dinhmun zirchianna turin zawhna chhan tur (questionaire) an sem dawn a, zirtirtute pawh mental health lama intuaihriamna hun hmanpui a ni ang.