PWD CE-in Serchhipa kawngpui tlahniam a enfiah

YMA sub-headquarters, Serchhip hnuaia Vigilance & Monitoring Committee member-te leh PWD chief engineer (Highway) K Lalsawmvela te chuan nimin khan Serchhip Tuikhuah Veng leh Dinthar Venga NH-54 kawngpui tlahniam (sinking area) leh Sesah lui bula NH-54 kawng chhe laite an enfiah.

NH-54 kawngpui tlak-hniamna laite leh kawng chhe laite a hmuna an enho hnuah, Serchhip Sub-Hqrs. YMA pisaah hmalak zel dan tur an sawiho nghal. Tuikhuah Veng leh Dinthar Venga NH-54 kawngpui chu kuminah pawh inchi 2 vela a tlakhniam belh thu an sawi a; lei a tlahniam zel tur dan nan tuihawk luankawr ṭha tak siam a, a thlang ruamah checkdam pali/panga vel siam ni se, an ti.

Sawihonaa tel ve Geology & Mineral Resources (GMR) director Lalhma-chhuana chuan, lei awm dan zir chiang turin a rang lamin geologist an tirh tur thu leh, geologisty-te thil hmuh dan aṭangin hmalak dan tur rawtnate chu PWD CE K Lalsawmvela hnena an thehluh tur thu a sawi.

K Lalsawmvela pawhin, Ministry of Road, Transport & Highway Chief Engineer (NE changtu) hnen aṭangin hmalakna tur sum dil chhuah a lo tum tur thu a sawi.

PWD CE chuan, Sesah luia NH-54 kawngpui chhe lutuk chu PCC hmanga siamṭhat a nih theih nan hmalak a nih tur thu a sawi a; Serchhip YMA hruaitute ngenna angin, lei tlakhniama hmunah tuihâwk luankawr ṭha tak siam tuma hmalak a nih tur thu a sawi bawk.