KHAWTHLIR

Thisen pe
GM Higher Secondary School, Champhai NSS unit chuan nimin khan blood donation camp an huaihawt a, Champhai District Hospital tan mipa 59 leh hmeichhia 32-in thisen unit 91 an pe.

BD result
Senate of Serampore hnuaiah Aizawl Theological College (ATC)-a Bachelor of Divinity (BD) final year result chu tun hnai khan tihchhuah a ni a, zirlai 23 an pass. ATC-a BD zirte zingah hian A- grade-ah mi pakhat, B+ grade-ah mi 10, B grade-ah mi 11 leh B- grade-ah mi pakhat an pass a ni.

SP Mukherjee pual-in hun hmang
BJP, Mizoram Pradesh chuan nimin khan an party pisaah BJP din chhuahna atana mi pawimawh, India ram leh mipui tana nasa taka thawk a, a nunna hial hlantua an ngaih Dr Syama Prasad Mukherjee hriatrengna hun an hmang. SP Mukherjee hi July 6, 1901-ah Calcutta-ah a piang a, June 23, 1953-ah a tànna hmun Srinagar-ah chhan hriat lohin a thi. Amah hi Nehru chhungkuain India rama ro an rel dan nasa taka sawisela dodaltu niin, chuta tana an hmalakna pawl, Jana Sangh dintute zinga mi pawimawh a ni a; Jana Sangh hi BJP dinna chhan bulpui pakhata ngaih a ni.

Revival Meet
Synod Revival Meet vawi 6-na chu nizan khan Ramthar Veng Kohhran biak-inah ṭan a ni. Meet-ah hian thupui chu 'Min tiharh leh ta che' tih a ni a, revival speaker hrang hrangin an sawi ang. Meet hian June 25, Pathianni zan thleng a awh dawn a ni.

Lirthei dah khap
Traffic SP chuan thupek chhuahin, Khatla Local Council hotute ngenna angin, Khatla Presbyterian biak-in chhak, kawng chhak lam kual lai meter 100 chhung ah lirthei dah phal a nih loh thu a tarlang. Thupek hian ṭul bik thila hun rei lote chhung din phalsakte erawh a huam lo.