Ka ṭanpui theih loh zawng zawng hnenah An ngaihhnathiamna ka dil e - Ronald Sapa

July 19, naktuk aṭanga Rajya Sabha MP aṭanga chàwl tur Ronald Sapa Tlau chuan, MP a nih chhunga a puihna diltu, a ṭanpui theih loh zawng zawngte hnenah an ngaihhnathiamna a dil. Ronald Sapa hian nimin khan MP aṭanga a chawlh dawn hnaih avangin Aizawl Press Club-ah MJA member-te inthlahna press meet a neihpui a ni.

Ronald Sapa chuan, a tlin rêng vanga Rajya Sabha MP ni thei a nih loh thu sawiin, "Pathian leh kan par­ty hruaitute duhsakna vang a ni. Keimahah theihna bik a awm lo. Mahse, ram hmangaihna thinlung kan put ve avangin theihtawp ka chhuah. Congress MP ka ni lo a, Mizoram mipui MP ka ni tih hi ka ngaihdan a ni," a ti.

MP-te'n state sorkarin ti tura a hrilhte sorkar laipuiah an bawhzui ṭhin thu sawiin Ronald Sapa chuan, "Hetih rual hian, mahni ṭhahnemngaihnaa tih ngai a awm bawk," a ti a, MP a nih hnuah inzir chawpna tur a tam thu a sawi.

Rajya Sabha MP chuan, Thenzawl Golf Course chu a mimal hmalakna ni lo mah se, hma latute zingah a tel ve thu sawiin, "Tourism Ministry-ah scheme a awm lo chungin golf course hi kan nawr chhuak a ni. Ram páwn aṭangin rawn khèl châk mi hausa tak tak an tam. Sorkar hian tihlamzuih lo hrâm se ka duh tak zet," a ti.

Ronald Sapa chuan, Aizawl khawpuia traffic jam tihrehna atan kawng chhâwng siam chu a thláwp lo tih sawiin, "Kulikawn-Bawngkawn inkarah hian cable liner hman ṭha ka ti. Hma ka la a, chutih laia chief minister Pu Hawla remtihnain ka bawhzui a ni. Finance Ministry ka sawipui a, ADB mithiamte an rawn tír a, mahse, ropeway khawihtute nen an inhriat ṭhat vangin ropeway an rawt leh tho a ni," a ti a, cable liner chu bawhzui ni se a duh thu a sawi. 

Rajya Sabha MP a nih angin mimal leh pawl hrang hrangin puihna an dil ṭhin thu sawiin, "Ka puihna min diltu zawng zawng ka tihlawhtlinsak thei loh, a bik takin MP fund-ah, ka puih theih loh zawng zawngte ngaihnathiamna ka dil a ni," a ti a; hun harsa ber a tawn lai pawha amah thláwpa ṭawngṭaisaktu mipui chungah lawmthu a sawi a ni. MJA president Zonunsanga Khiangte pawhin thu sawiin, Citizenship Amendment Bill chungchangah Ronald Sapa chu ṭhahnemngai taka a au chhuah ṭhin thu a sawi a, "Kan ram leh hnam tana ṭhahnemngai taka a au chhuahna kha kan bengah a chám reng tawh dawn a ni," a ti a, ram hmangaihtu a nih thu a sawi.

Zonunsanga Khiangte chuan, Ronald Sapa'n press mite a ngai pawimawh a, MJA duhsak ṭhintu a nih thu sawiin, "Tun hma aṭangin MJA hnìm hnai rengtu a ni a, MJA a duhsak em em reng a ni. Kan lawmna ber chu, press mite priority min pe reng hi a ni a, hetiang hi kan ram hruaitute hi ni vek se kan duh hle a, MP la ni leh zel turte pawhin chhunzawm se. Chu chu mipui tan a ṭha a ni," a ti. MJA Gen. Hqrs. chuan MP kal chhuak tur Ronald Sapa Tlau hnenah ngaihhruina thilpek an hlan a ni.