Covid-19 vei tawh zat mi 272 Negative leh tawh zat mi 170

July 16, Ningania Zoram Medical College (ZMC) laboratory-ah swab sample 248 endik zingah Covid-19 hripui vei mi panga hmuh belh leh a ni a, Mizorama Covid-19 vei hmuh tawh zawng zawng chu mi 272 an ni. Hetih lai hian, Lungleia BSF mi leh sa hripui vei pakua chuan an vei tawh lo (negative tawh) tih hmuh a ni thung. Heti hian Covid-19 vei negative leh tawh zat chu mi 170 an ni.

Ningani khan ZMC laboratory-ah mipa 155 leh hmeichhia 93-te swab sample endik a ni a; Aizawl district-a mi 117 leh Assam lam mi 19-te bakah, Siaha (1), Champhai (3) Kolasib (94), Serchhip (12) leh Lawngtlai (2) aṭanga an dawnte a ni. Mi pangain Covid-19 an vei laiin, mi 243 an fihlîm. Lunglei Civil Hospital (LCH) laboratory-a mi 23 endikte an fihlîm vek bawk.

Sorkar thuchhuah tarlan danin, July 16-a Covid-19 vei hmuh tharte hi Mizo vek, kum 20-39 inkar, mipa pali leh hmeichhia pakhat an ni a, Aizawl district mi pathum leh Serchhip district mi pahnih an ni. Karnataka, Uttar Pradesh, Bihar, Nagaland leh Tripura aṭanga tun hnaia lo hawte an ni a, quarantine facility-a awm lai vek niin, harsatna (symptom) nei an awm lo.

Hetih lai hian, Border Security Force (BSF) mi leh sa, Covid-19 vei vanga Covid Care Centre (CCC) - SIRD, Pûkpuia awm mekte chu Ningani khan LCH laboratory-ah TrueNAT hmangin an swab sample endik a ni a, mi pakua chuan hripui an vei tawh lo tih finfiah niin, mi dangte erawh chu an la positive zel rih thung. LCH-ah hian hripui kai theia ngaih mi 11 endik nawn leh a ni bawk a, an fihlîm vek a ni.

Sorkar aṭanga thu tihchhuahte aṭanga a lan dan­in, Mizorama Co­vid-19 vei hmuh chhuah tawh mi 272 zinga mi 170 chuan an vei tawh lo (negative tawh) a, chu chu 62.50% a ni. Hripui vek mek zat chu mi 102 an ni a, 37.50% an ni.

Covid-19 negative leh tawh mi 170 zinga 160 chu chhuahtir an ni tawh a, chhuahtir tawh zat hi vei tawh zat aṭangin 58.82% a ni. Negative tawh mi 170 zinga 10 erawh chu Lunglei leh Kolasib-a CCC-ah an awm mek thung.