Aizawla pelican crossing hawn a ni Music City siam kan tum - Tawnluia
Aizawl Smart City project aṭanga Aizawla lirthei leh kea kalte kal hun kawhhmuhtu pelican crossing system bun thar chu nimin khan UDPA department enkawltu deputy chief minister Tawnluia'n a hawng. Dy CM chuan, pelican crosing chu hmang ṭangkai turin mi tin a chah a; Smart City project hnuaiah Aizawlah Music City din tum a nih thu a sawi.
Dy CM Tawnluia hian Aizawl khawlai hmun pariata pelican crossing bunte chu Treasury Square-ah a hawng a, Assembly Annexe conference hall-ah hawnna inkhawm hman zui a ni. Minister chuan, pelican crossing chu lirthei khalhtute leh kawngpuia kea kalte tan himna thlentu a nih ngei a beisei thu sawiin, hmang ṭangkai turin mi tin a chah.
Tawnluia chuan, Aizawl khawpui a ṭhang nasa a, hmun hrang hrang aṭangin mi an pém khawm tih sawiin, "Mihring an pun ang bawkin lirthei a pung nasa a, mumal zawka lirthei tlân dan leh kea kal mipui himna atan kawng hrang hrangin hmalak a ni. Aizawlah pelican crossing system hman a ni ve ta hi Aizawl traffic management chanchinah méllung pawimawh tak a ni," a ti.
Dy CM chuan, Aizawl Smart City hnuaiah ṭhalaite phûrpui leh mamawh em em infiamna lam leh thil dangte siam zel tum a nih thu sawiin, "Zemabawk, Durtlang, Chite, Tuivamit, Hlimen leh Edenthar Vengahte international standard playground siam tum a ni a, Mizote ngainat zawng leh tuihàlna phuhrûk turin Music City changtlung tak siam tum a ni," a ti a; New Capiotal Complex-ah lndscape mawi tak chu siam tum a nih thu a sawi.
Smart City-in a tum ber chu mi tin huap innghahna tlak khawpui siam a ni tih sawiin Tawnluia chuan, Covid-19 vanga harsatna a awm mek chungin, chak zawka hna thawk turin theihtawp chhuah mek a nih thu a sawi bawk.
Pelican crossing hi Aizawla hmun pariatah 10 bun a ni a, a bun hna thawktu chu Innovations Delhi niin, Rs. 22,17,810 sénga siam a ni.
Deputy CM Tawnluia sawi danin, Smart City hnuaiah project 78 hlâwm khawm a ni a, chu'ng zinga project 33 chu state sorkar hmalakna, state matching share atana telh a ni. Detailed project report (DPR) 27 siam tawh zinga project 10-ah tender chhuah a ni tawh a, mahse, chhángtu an awm loh avangin tender chhuah nawn tum a ni. Project hrang hrang atan sorkar laipui aṭangin cheng vbc. 500 Mizoramin a hmu dawn a, sorkar laipuiin cheng vbc. 128 a pe chhuak tawh.
Pelican crossing system hawnnaah hian Aizawl Municipal Corporation (AMC) mayor PC Lalhmingthanga chuan, pelican crossing chu hmasawnna leh khawpui changkang zelin a ken tel a ni tih a sawi a, "Mipui himna leh awlsam tura ruahmanna ṭha tak a ni. AMC chuan Aizawlah kea kalte him zawk nan hmun tam takah pedestrian footpath a siam mek a, khawpuia chengte'n khawpui ṭhan zelna turah ngaituahna kan sèn a pawimawh," a ti.
Hawnna inkhawm hi UDPA secretary Dr C Vanlalramsanga'n a kaihruai a; minister of state Robert Romawia Royte, MLA pasarih - Ramthanmawia, C Lalmuanpuia, Dr Vanlalṭanpuia, Dr ZR Thiamsanga, Dr K Pachhunga, H Biakzaua leh Zothantluanga te, AMC leh deputy mayor Lalringliana te pawh an tel. IGP (Law & Order) LH Shanliana'n thu a sawi bawk.
Pelican crossing-ah hian rawng chi thum - a hring (green), a sen (red) leh serthlum rawng (orange)-te a awm ṭhin. Rawng hring a lan laiin kal/tlàn theih a ni a, rawng sen a lan laiin din tur a ni. Serthlum rawng a lan lai erawh chuan fimkhur taka kal/tlân theih tihna a ni thung. Aizawla an bun erawh chu rawng hring leh sen chiah awm chi a ni a, mihring thunun chawp zel ngai loa tih theih ni mah se, Aizawlah chuan traffic police-te'n manual-in an enkawl rih ang.
Pelican crossing dahnate
Dahna hmun A zat
Chanmari kâwn 1
Zarkawt 2
Millennium Centre 1
Civil Hospital bul 1
Lammual gate bul 1
Treasury Square 2
Israel Point 1
Aizawl PS thlang 1