KHAWTHLIR

GAD huaihawtin nimin khan New Capital Complex huam chhung­ah thing phun a ni a, additional chief secretary JC Ramthanga'n a telpui. GAD-a thawkte chuan thing 30 an phun a, thing an phun thar leh an phun tawh thlai, pangpar leh thing chi hrang hrangte humhalha duat taka enkawlpui turin mipui an ngen a ni.

Evangelical Church of Maraland hnuaia CCI(M) KṬP Siaha bial no. 11 chuan nimin khan Siaha District Hospital blood bank tan thisen unit 26 an pe a, petute mipa 21 leh hmeichhia panga an ni.

Federation of Mizoram Samagra Employees (FEMSE) chuan Covid-19 donaa sorkar thâ tihchakna atan nimin khan district thar pahnih - Khawzawl leh Hnahthiala damdawi-inte hnenah generator an pe. Generator leina atan hian Samagra hnuaia thawkte'n pawisa an thawh khawm a ni.

Champhai South bialtu MLA TJ Lalnuntluanga chuan nimin khan Champhai Kanan Veng Middle School-ah a bial chhung mi HSSLC leh HSLC compartmental exam-a pass-te lawmpuina a hlàn. TJ Lalnuntluanga chuan, zirlai hlawhtlinna changte thinlung taka a lawmpui thu sawiin, an zir zelna turah duhsakna a hlân a ni.

Lalhmachhuana Zofa lehkhabu ziah 'Mizo Lalte' tih chu nimin khan deputy chief minister Tawnluia'n a pisaah a tlangzarh. Lalhma­chhuana Zofa hi Diktawn magazine editor a ni.

State Referral Hospital (SRH)-ah nimin khan Covid-19 vei mi 16 dah luh a ni a, hripui vei rinhlelh thilah mi pali dah luh a ni bawk. SRH (ZMC)-ah hian Covid-19 vei mi 46 enkawl zinga harsatna nei lo leh enfiah­na hrang hranga 

ṭha mi 22 chu Covid Care Centre (CCC) -Tribal Art Centre, Tanhrilah nimin khan sawn an ni. SRH-a enkawl mek mi 24 an awm a, an zinga mi 21 chu Isolation Ward-ah awmin, ICU-a enkawl mi pathumte'n hma an sawn zel tih SRH-ZMC Bulletin chuan a tarlang.

Lawngtlai District Nehru Yuva Kendra (NYK) bultumin nimin khan Lawngtlai DAO pisa tualah moringa (thing behlawi) ṭiak sem a ni. Moringa ṭiak hi 1,000 sem a ni a, Lawngtlai khawpui chhung leh páwna a chíng duh inhriattirte hnenah pek a ni. DHO C Lianluaia chuan moringa thing chu khawvelin a ngaihsan, a hnah, a rah leh a zung thlenga chawhmeh atan leh damdawi atan pawh ṭangkai taka hman theih a nih thu a sawi

ZMC Covid-19 La­boratory-ah nimin khan swab sample 160 vel endik a ni a, State Refe­rral Hospital-a awm sate bakah, Aizawl, Siaha leh Champhai aṭanga sample an dawnte a ni. He thu ziah lai hian test result a la chhuak lo.