CQC atana an hmun hman tirtute hnenah Lunglei DC hoin lawmthu sawi a ni

Nimin khan Lunglei DC V Lalsangliana hoin DC conference hall-ah Covid-19 avanga state pawn aṭanga an district mi leh sa lo hawte khunghranna hmun (Community Quarantine Center) atana an hmunhma hman tir tute chunga lawmthu sawina hun hman a ni.

V Lalsangliana chuan Covid-19 avangin state pawn aṭangin an district mi leh sa ṭhahnem tak an lo haw tih sawiin, "Tangkhang rawn haw runpui laiin sorkar hmunhma neihte’n a dawl zawh meuh loh avangin May, 2020 khan kohhran­hote puihna leh ṭawiawmna ngen a ni. Sorkar ngenna kohhrante’n inphal taka lo chhangin Lunglei khawpui chhunga veng 12-ah kohhran hmunhmaah CQC 21 zet din a ni,"  a ti.

CQC-ahte hian tangkhang lo haw mi 216 te tluang taka qua­rantine an nih thu sawiin Lunglei DC chuan, "An hmunhmate phal taka hman hawhtira mipuite tan bang loa ṭawngṭai saktu kohhran­hote chungah lawmthu kan sawi tak meuh meuh a ni," a ti a, kohhran hruaitute chu hun lo kal zel turah pawh thawhho leh hmalak puiah a sawm.

V Lalsangliana chuan Co­vid-19 chu khawvel ram hrang hrangte’n an mangan pui laiin Mizoramah chuan mi tlawm­ngai leh thawh hreh nei lo task force kan nei chu a vanneih­thlak tih sawiin, "An inpekna leh thawhrimna avangin an chungah lawmthu ka sawi tak meuh meuh a ni. Hripui do letna kawnga medical team, official leh security-te inpekna leh ṭha­hnemngaihna a fakawm hle," a ti.

Lawmthu sawi inkhawmah hian Lunglei SP Stephen Lal­rinawma leh CMO Dr Thani Pachuaute pawh an tel a, kohhran leh task force-te hnenah certificate leh lawmthu sawina lehkha hlan a ni.