College-ah morning/evening shift hawng turin ZPM-in sorkar an ngen
Zoram Peoples' Movement (ZPM) party chuan, Covid-19 léng avangin kum dang aiin kuminah Mizoramah college zirlai an tam dawn tih sawiin, pawl 12 zo thar zirlaite'n college-ah zirna an chhunzawm vek theih nan college tinah Mizoram sorkarin morning shift leh evening shift hawng se an duh thu an tarlang.
Nimina ZPM thuchhuah chuan, Covid-19 lêng leh inkhàrkhip avangin state páwna zirlaite leh hna thawk tam tak Mizoramah an rawn haw tih tarlangin, tun dinhmunah chuan state páwna chhuah leh a ngamawm rih lo tih a sawi a, "Pawl 12 result a chhuak hlim hlawt a, kum dang ni se, phai lama lehkha zir tumin mi tam takin Mizoram chhuahsanin zirna tur zawngin phai lamah an liam sung sung ngei ang," a ti.
Kum dangah chuan pawl 12 zo hlim zinga mi tam takin lehkha zir chhunzawm turin phai lam an pan ṭhin tih sawiin ZPM chuan, "Kuminah erawh chuan Covid-19 vangin phai lama lehkhazir tura chhuahsan a ngamawm rih lo," an ti a; chuvang chuan mi tam takin Mizorama zir chhunzawm an duh dawn tih an sawi.
ZPM chuan, Covid-19 a lèn loh kumah pawh Mizorama college hrang hrangah seat a tam tâwk loh avangin zirlai eng emaw zat chu an hnawng ṭhin tih sawiin, "Kuminah hian Covid-19 vanga ram páwna admission la tura chhuah a ngamawm loh avangin, college tinah admission a tâwtin mi tam takin an chang lo ang tih a hriat theih. Chuvangin, kumina pawl 12 pass chhuakte pual bik hian college tinah morning shift emaw, evening shift emaw buatsaihsak turin Mizoram sorkar kan ngen a ni," an ti.