State pahnih ramri chungchangah Mizoram leh Assam an inbe dawn

Mizoram sorkar leh Assam sorkar chu state ramri buai chungchangah August 9, 2022 khian Aizawlah an inbe leh dawn. Assam aiawhte chu Border Protection & Development minister Atul Bora-a'n a ho ang.

Atul Bora Private Secretary chuan August 3, 2022 khan Mizoram Chief Secretary leh Home Secretary-te lehkha thawnin, Border Protection & Development Minister hoin Assam leh Mizoram ramri chungchanga inbe turin Assam aṭangin mi panga an rawn zin dawn thu a hriattir a ni.

Ruahmanna siam dan chuan, Assam team chu August 9 chawhma dar 10:45-ah Aizawl an rawn thleng ang a, zan khat riakin, August 10 chawhnu dar 2:55-ah Aizawl an chhuahsan leh ang. Border Minister hi Hou­sing & Urban minister Ashok Singhal, Border Secretary leh Border Minister assistant pahnih­in an rawn ṭawiawm dawn a ni.

Mizoram sorkar chuan Assam team-te hi Home minister Lalchamliana hoin an lo dawngsawng ang.

Lalchamliana leh Atul Bora kaihhruai hian Mizoram leh Assam sorkarte chu August 5, 2021 khan Aijal Club-ah an lo inbe tawh a, hemi ṭum hian joint statement siamin, state pahnih ramri leh a chhehvelah remna leh muanna a awm theih nan inbiakna hmanga hmalak dun leh a ṭul apianga hmalak an remti a; remna leh muanna vawn nun a nih theih nan sorkar laipui neutral force dah an remti a ni.

Assam-Mizoram Joint Statement
1. Assam leh Mizoram sorkar chuan Ministry of Home Affairs (MHA), Assam leh Mizoram chief minister-te'n ram inrina vela boruak sosang tireh tur leh inbiakna hmanga chinfel tuma hma an laknate lawmawm kan ti a, kan pawmpui.
2. July 26, 2021-a thite (inkahnaa Assam police thite) Mizoram sorkar aiawhte'n pawi an tih thu leh hliamte dam thuai tura an duhsak thu an sawi.
3. State pahnihte chuan ramri leh a chhehvelah remna leh muanna vawn nun kan remti a, chumi atana sorkar laipui neutral force dah kan remti. Heta tan hian state pahnihte'n an police leh forest mite an awmtir lo ang a, patrolling an ti lo ang a, state police an dah thar tawh lo ang. Hei hian Assam-a Karimganj, Hailakandi leh Cachar district te, Mizorama Mamit leh Kolasib district-te a huam.
4. Ramri leh a chhehvelah remna leh muanna vawn nun leh kenkawh a nih theih nan Assam leh Mizoram sorkar chuan a ṭul apianga hmalak kan remti a ni.