Covid enkawlnaa ei-in man bá leh Volunteer-te hlawh pek thuai phût
ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; quarantine centre leh covid care centre (CCC)-a ei leh in man leh Covid donaa thawk tura inpe (volunteer)-te lawmman cheng nuai 96.30 sorkarin a la ba mek tih sawiin, pe thuai turin Mizoram sorkar an phût.
ZPM Ṭhalai vice president Dr C Lalrammawia chuan, RTI Act hmanga an zawhna chhan a nih danin, Mizoram sorkarin quarantine centre leh CCC-a ei leh in man cheng nuai 66.37 leh Covid volunteer-te lawmman cheng nuai 29.93 a la ba a, a vaiin cheng nuai 96.30 a la bat thu a sawi.
Dr C Lalrammawia chuan, "Covid-in hun rei tak chhung ziaawm lam a pan tawh hnuah leh Chief Minister's Relief Fund for Covid-19 ah sum tam tak a luh ruih ruih laia heti zozai mai sorkarin leibá a la nei hi pawi kan ti a, a dawng turte hnenah pe thuai turin kan ngen a ni," a ti.
ZPM Ṭhalai Vice President sawi danin, Assembly session zawhna leh chhànnaa a lan danin, Mizoram sorkarin state budget aṭangin lockdown lai khan lockdown vanga harsatna tâwkte tan ṭanpuina a pe miah lo a; chutih laiin, CM Relief Fund for Covid-19 ah kohhran, pawl leh mimalin thawhlawm tam tak an chhûng lut thung.
MNF kaihhruai sorkarin an sorkar tirh aṭanga hripui lên hnu March 2021 chhungin mau chìnna atan cheng nuai 272.60 an sén tawh thu sawiin C Lalrammawia chuan, "Hripui lên lai tho khan Kamrula hnenah airport cute sakna tur cheng nuai 7,051 man hna an lo pe tawh. Hei hian an ngaihsak zawng leh an duhnaah chuan Mizoram sorkarin sum an lo ui lo hle tih a tarlang a ni," a ti.