National Commission for Protection of Child Rights, State Commission for Protection of Child Rights leh Lunglei DC pisa chuan nimin khan DC conference hall-ah naupang rûkbo leh sumdawnna atana hman laka invenna chungchang zirhona an buatsaih. Kuminah Mizoramah human trafficking case pahnih a awm tawh thu tarlan a ni.
Lunglei bawrhsap Kulothungan A chuan, an district chu international border hrûla awm a nih avangin international child trafficking thleng thei lakah inven a pawimawh thu te, mipui zirtirna lamah ṭan lak a ṭul thu leh a kaihhnawih sorkar department-te an ṭan rual a ṭul thute a sawi.
Lunglei SP Rex Zarzoliana Vanchhawng pawhin thu sawiin, India ram state dangte khaikhinin Mizoramah mihringa sumdawnna thubuai tam lo mah se, kum tin deuh thaw thubuai a awm thu a sawi a; international human trafficking ti ṭhinte'n Mizoram chu kalkawngah an hman ṭhin thu leh, human trafficking do turin Police hnuaiah Anti-Human Trafficking Unit din a nih thu a sawi bawk.
Zirhonaah hian naupang dikna chanvo hrang hrang te, naupang rûkbo an nih lohna atana hmalak dan tur leh invên dan tur te zirho a ni a; mihringa sumdawnna chu ruihhlo leh ralthuam tawlh rûk dawtah khawvela international organised crime lian ber pathumna a nih thu te, kum tin thubuai a pun thu te tarlan a ni.
Tarlan danin, India ramah kum 2020 khan human trafficking case 1,714 ziah luh a ni a, chumi kaihhnawihah chuan mi 4,966 man a ni. National Crime Records Bureau chuan kum 2020 khan India ramah mi 3,23,170 an bo angin a chhût a; case tam zawk chu report loha ngaih a ni.