Minister-in Central EFCC hotute a kâwm

Environment, Forest & Climate Change minister TJ Lalnuntluanga chuan August 4, Ningani khan sorkar laipuia EFCC secretary Leena Nandan leh director general of forest CP Goyal te New Delhi-ah a kâwm a, Mizorama carbon trading/green credit chungchang leh EFCC department kaihhnawih thil pawimawhte a sawipui.

TJ Lalnuntluanga chuan, carbon trading/green credit chu awmze nei leh mumal taka kalpui dan tur leh tribal state-a hmalak dan turte a sawi a, "Central lamin inkaihhruaina mumal tak a la neih loh avangin India ram pum huapa inràwnkhawmna zau zawk neih a ṭul," a ti.

Minister chuan, Mizoramin wildlife sanctuary leh tiger reserve a neihte atana hna thawhna tur (APO) state sorkarin a thehluh ṭhin chu a hun taka hna thawh a nih theih nan leh thawktute'n a hun taka hlawh an lâk theih nan hmalakpui turin a ngen a ni.

National park leh wildlife sanctuary-te chu a ram zau zawng ang zela chhûtin India ram pumah 5.3% a nih laiin, Mizoramah chuan 9.48% a nih thu sawiin TJ Lalnuntluanga chuan, India ram pum chawhrual aia a zau avangin Mizoram chu special incentive pe turin a ngen bawk.

EFCC Minister chuan, Mizoramah Nature Learning Center (NLC) a la awm loh thu te, India rama forest cover/green area zau zawng za zela chhutin Mizoram chu a sang pawl a nih thu leh, NLC din tura dilna an thehluh chu pawmpuia sum pe turin a ngen bawk a ni.

Minister ngennaah hian sorkar laipui hotute chuan theihtawp chhuaha hma an lâkpui tur thu an sawi niin sorkar thuchhuah chuan a tarlang.